Bọu ene, i Belsyazar nakoạ datu su Babelẹ̌. Piạ su sěhěbi, i sie někoạ pesta kụ nẹ̌kui 1.000 taumata penting. I sie něngoro su manga ělange pěněbang manga mangko wul᷊aeng nial᷊ạ i Nebukhadnezar bọu bait i Yehuwa. Belsyazar dingangu manga sakene něnginung anggorẹ̌ něpakẹ manga mangko ene apidu mědẹ̌dalo mawung i sire. Sěngkělěndịu piạ lima siměpụ kụ němohẹ bawera tawe nikaěnang su darěndung tampạ i sire kụkaěng.

I Belsyazar sěbạe natakụ. I sie nẹ̌kui mapapandeng ilmu gaib kụ naul᷊ị, ’Mạeng piạ u makal᷊ahẹ mangal᷊ene bohẹ ene, iạ sarung měhengkẹ si sie makoạ taumata katělune sěbạe makawasa su Babelẹ̌.’ I sire turusẹ̌ měnẹ̌nal᷊ukạ mẹ̌basa, katewe tawẹ apa makal᷊ahẹ ene. Bọu ene Ratu diměnta kụ nẹ̌bera, ’Kangerẹ piạ sěngkatau esẹ arenge i Daniel, i sie hanesẹ̌ mělẹ̌lahẹ iping i Nebukhadnezar. I sie botonge makal᷊ahẹ bohẹ ene si Tuang.’

I Daniel nakoạ sarang Datu. Bọu ene i Belsyazar nẹ̌bera, ’Mạeng i kau botonge makawasa dingangu makal᷊ahẹ bohẹ ene, iạ sarung měgělị si kau sohọ bul᷊aeng, kụ i kau sarung makoạ taumata katělune su Babelẹ̌ piạ kawasa gěguwạ.’ Daniel simimbahẹ̌, ’Iạ madiri hadiah bọu i Tuang, katewe iạ mělahẹ apa mangal᷊ene bohẹ ene. Nebukhadnezar, papạ i Tuang, kai maobotẹ̌, kụ Yehuwa napakamea si sie. Tuang lai masingkạ apa nariadi si sie. Katewe, i Tuang tawe něngadatẹ̌ si Yehuwa. Tuang něpakẹ manga mangko wul᷊aeng bọu bait i Yehuwa gunang měnginung anggorẹ̌. Hakị u ene, Mawu němohẹ bawera ini: Mene, Mene, Tekel, dingangu Parsin. Bawera ene mangal᷊ene kararatuang Media dingangu Persia sarung měmatạ Babelẹ̌, kụ i Tuang seng tawe makoạ datu.’

Su tempo ene, kakělaěng tawẹ apa makakala Babelẹ̌. Soa ene nilikutangu těndạ masuwenehẹ̌ dingangu sal᷊ụ sěbạe maral᷊ung. Katewe, su hěbi ene lai tau Media  dingangu Persia nělawang soa ene. Kores, datung Persia, někoạ akẹ u sal᷊ụ ene nělenga sarang tampạ bal᷊inẹ, hakị u manga prajurit botonge makal᷊iu sal᷊ụ ene kụ nahumpạ su gěrbangu soa ene. Gěrbangu soa kạbawuka! Manga prajurit ene simuẹ̌, nakakala soa ene, kụ němate si Datu Belsyazar. Bọu ene, i Kores nakoạ měngangawasa su Babelẹ̌.

Sěntaung bọu ene, i Kores němohang, ’Yehuwa něngoro si siạ saụ pěkoạ bait su Yerusalem. I saing mapulu mẹ̌tul᷊ung, botonge matamai sarang Yerusalem.’ Hakị u ene, su apang seng 70 su taunge Yerusalem niwinasa, lawọ tau Yahudi napul᷊ẹ sarang Yerusalem. Ene kere dianding i Yehuwa si sire. Kores něnul᷊e mangko wul᷊aeng dingangu perak, lai manga barang nial᷊ạ i Nebukhadnezar bọu bait su Yerusalem. Apa i kau nakasilo kerea i Yehuwa něpakẹ si Kores gunang mẹ̌tul᷊ung manga ělang’E?