I Belsazara ty nanjare mpanjaka i Babylona tafara tatoy. Nanasa manam-boninahitse arivo reke hanao fete tamy ty halegne raike. Nampangalae’e o mpanompo’eo ty kopy volamena nandese i Nebokadnezara boake tamy ty tempoly i Jehovah tagne. Ninoma iareo divay i kopỳ, le nidera ty andrianagnahare’e iareo. Tampoke teo, le nisy tagnan-dahilahy niseho ty tamy i sisin-tragnoy ey sady nanoratse raha hafahafa.

Natahotse ty Belsazara, le nitoka i ambiasa’e rey. Hoe reke: ‘Naho misy mahay ty dika o soratseo, le hataoko manam-pahefagne fahatelo a Babylona eto.’ Tsy nisy nahay nagnazava i soratsey. Hoe i valy i mpanjakay: ‘Misy lahilahy atao tihoe Daniela zay ty eto nagnazava ty nofy i rae’o. I reke ka ty mahay magnazava o soratseo.’

Ie niavy ty Daniela, le hoe ty Belsazara: ‘Naho hai’o ty mamaky o soratseo sady naho fanta’o ty dika’e, le homeako rojo volamena rehe sady ho manam-pahefagne fahatelo a Babylona eto.’ Hoe ty Daniela: ‘Tsy meagne izay raho, faie ho rehafeko ama’o avao ty dika o soratseo. Nirehareha ty Nebokadnezara rae’o, le natao i Jehovah tsinotsinogne. Fanta’o soa ze raha zay faie tsy nagnaja i Jehovah rehe, satria mbe ninogne divay tamy i kopy volamena boake amy i tempoli’ey agne. Izay ty nahavy i Jehovah nanoratse ty soratse tia tie: Mene, Mene, Tekela, naho Parsina. Ho rese ty Mediana naho ty Persiana ty Babylona, le tsy ho mpanjaka sasa rehe. Izay ty dika o soratseo.’

Hoe nofinofy ty handreseagne i Babylona satria matevegne ty manda’e sady nisy renerano ty niaro i tanàgney. Tinafy o Medianao naho o Persianao i tanàgney. Natsile i Kyrosy mpanjaka persiana  lalagne i ranoy, soa tie afake militse ao i maramila’e rey. Nivoha avao ka i lalambeỳ. Nandrava naho nanimba i tanàgney i maramila rey sady vinono iareo i mpanjakay, le i Kyrosy ty nanjare mpanjaka i Babylona.

Hoe ty Kyrosy tao’e raike tafara izay: ‘Nisaontsy tamako ty Jehovah mba hagnoregne i tempoli’ey a Jerosalema agne. Ze te hagnampe amy ty fanoagne izay le afake mandeha.’ Niavy eo ty fampitamà i Jehovah tie hampolieko a Jerosalema agne o Jiosio naho afake 70 taogne. Nahere i Kyrosy ze fitaovagne nalae i Nebokadnezara tamy i tempolỳ ao, agnisa izay ty kopy volafotsy naho volamena. Nampiasae i Jehovah hagnavotse ty vahoa’e ty Kyrosy.