Yange shighe karen yô, Beleshasar tema tor sha Babilon. A er iniongo, a lôhô ior mba tagher tagher mba ken tar na iorov dubu môm. Maa a na zwa ér i va a ukôôpu mba yange Nebukadinesar za kura ken tempel u Yehova la. Tsô Beleshasar kua ior mba ve va iniongo na la cii gba man kwagh a ukôôpu mbara shi wuese mbaaôndo vev. Ica i gbe ga yô, tiônwe u or due gba ngeren kwagh sha kpekpe u iyou i tor tema ker vea ior ve lu man kwagh la. Kpa or môm fatyô u ôron shin pasen inja i ngeren shon ga.

Yange cier Beleshasar iyol. Nahan a yila ior nav mba eren ahir, a tôndo zwa a ve ér: ‘Or u nana fatyô u pasen mo inja i ngeren ne cii yô, me ver nan tor u sha utar u cirin ken mo, ken Babilon cii.’ Ve kar, kpa or ve môm nan fatyô u pasen inja i ngeren la ga. Tsô kwase u Tor Beleshasar va nyôr ken iyou la, kaa ér: ‘Orgen iti na ér Daniel, yange pasen Nebukadinesar akaa. Nahan una fatyô u pasen we inja i ngeren ne.’

Daniel za van hen Tor Beleshasar yô, tor kaa a na ér: ‘Aluer u pase inja i ngeren ne yô, me na u isha i haren sha mon, i sha zenaria, shi me ver u tor u sha utar u cirin ken mo, ken Babilon cii.’ Daniel gema kaa ér: ‘De nem iyua ga, kpa me pase u inja i ngeren ne. Teru Nebukadinesar yange kende a iyol sha, nahan Yehova hee un. U fa hanma kwagh u yange er un yô, kpa u laha Yehova sha ci u u ma wain a ukôôpu mba sha zenaria, mba ken tempel Na. Ka nahan ve Yehova a nger mkaanem man ye. A nger ér: ‘Mene, Mene, Tekel, Ufarshin. Man inja i ngeren ne ér, Mbamedia man Mbapershia vea va hemba Babilon ityav, nahan u kera lu tor ga.’

Yange lu inja er tar môm tsô kpa ua fatyô u hemban geri u Babilon ityav ga nahan. Yange i mar geri ne i kase shi kpekpe na civir kpishi, shi ifi kase un ningir tser, man ifi shon za je gande. Nahan lu ican tsung u za tan ityav sha geri shon. Kpa hen tugh mbu iniongo i Tor Beleshasar lu  zan hemen la je, Mbamedia man Mbapershia va ta ityav sha geri u Babilon la. Shirushi, tor u Pershia yange va a shoja na, ve va time mbaakpa, ve goom a mngerem ma ifi la lu kuwan yemen vegher ugen, maa ve hungwa ve per. Mba zan hen ihinda i nyôron ken geri la yô, ve nenge i wuhe i ga! Maa ve ta baa ve nyôr ker, ve hemba geri u Babilon ityav, shi ve wua Tor Beleshasar. Shirushi maa hingir tor u Babilon.

Ken inyom i hiihii i Shirushi tema tor sha Babilon la je, a yôô ér: ‘Yehova kaa a mo ér m hide m maa un tempel na ken Yerusalem her. Nahan ior nav mba ve soo u za wasen tom la cii yô, ve hide ve yem.’ Hii shighe u i tim Yerusalem la zan zan va hen shighe ne, lu anyom 70. Tsô Mbayuda kpishi hide yem ken tar ve, er Yehova vande tôndon zwa nahan. Shirushi yange tôô ukôôpu mba zenaria man mba azurfa man ikyav mbi Nebukadinesar yange za kura ken tempel la cii na, i hide i yem a mi. U nenge er Yehova yange tindi Shirushi sha u a wase ior Nav kpa?