L’edjedja ka wonya, Bɛlɛshaza akayongaka nkumekanga ka Babilɔna. L’otsho ɔmɔtshi, nde akelɛ nunu di’ɛnɛnɛ wa lo wodja lo fɛtɛ kɛmɔtshi. Nde akadjangɛ ekambi ande dia mbela akɔhɔ wa paonyi wakɔshi Nɛbukadinɛza oma lo tɛmpɛlɔ ka Jehowa. Bɛlɛshaza nde l’angɛndangɛnda ande wakanɔ wanu lo akɔhɔ akɔ ndo wakatombolaka tozambizambi tawɔ. La shashimoya, lonya lɔmɔtshi lakatombe ndo lakatatɛ mfunda ɛtɛkɛta w’ehekesa l’ehele ka luudu l’olelo.

Bɛlɛshaza aki la wɔma. Nde akelɛ anto ande wasala awui wa maji ndo akawalake ate: ‘Naka onto nembetshiyami ɛtɛkɛta ɛnɛ, kete layowetɛ onto la sato lo lowandji la Babilɔna.’ Vɔ wakahembe, koko ndooko onto l’atei awɔ lakakoke nembetshiya ɛtɛkɛta akɔ. Oma laasɔ, wadi aki nkumekanga akaye ndo akate ate: ‘Ekɔ pami kɛmɔtshi kelɛwɔ Danyɛlɛ lakalembetshiyaka nkumekanga Nɛbukadinɛza akambo. Nde koka kolembetshiya ɛtɛkɛta ɛnɛ.’

Wakaye la Danyɛlɛ le nkumekanga. Bɛlɛshaza akawotɛ ate: ‘Naka wɛ mbadia ndo nembetshiya ɛtɛkɛta ɛnɛ, dimi layokosha shɛnɛtɛ ya paonyi ndo layoketɛ onto la sato lo lowandji la Babilɔna.’ Danyɛlɛ akawotɛ ate: ‘Dimi bu l’ohomba wa weshasha ayɛ, koko layanga kotɛ kitshimudi y’ɛtɛkɛta ɛnɛ. Nɛbukadinɛza ka shɔ aki l’otako ndo Jehowa akookitshakitsha. Wɛ mbeyaka oseka dikambo tshɛ diakookomɛ, koko wɛ ambohindolɛ Jehowa lo nnɔ wanu lo akɔhɔ wa paonyi w’oma lo tɛmpɛlɔ Kande. Ɔnkɔnɛ, Nzambi akafundji ɛtɛkɛta ɛnɛ: Mɛnɛ, Mɛnɛ, Tɛkɛlɛ ndo Parasina. Ɛtɛkɛta ɛnɛ nembetshiyaka ɔnɛ ase Mediya ndo ase Pɛrɛsiya wayɔlɛndja Babilɔna ndo wɛ hatonga nkumekanga nto.’

Akɛnamaka dia ndooko onto lakakoke nɛndja Babilɔna. Osomba ɔsɔ wakadingama la mpele di’etale ndo l’ashi wa dingunda. Koko l’otsho ɔsɔ, ase Mediya ndo ase Pɛrɛsiya wakɔɔlɔsha. Kurɔ nkumekanga k’ase  Pɛrɛsiya akɛtɔya ashi dia asɔlayi ande monga l’akoka wa nkɛndakɛnda dimɛna ndo mbɔtɔ lo asoko w’osomba. Lam’akawakome lɛkɔ, nkuke yaki hwe! Asɔlayi wakalolanɛ lɔkɔ, wakalɛndja osomba ndo wakadiake nkumekanga. Oma laasɔ, Kurɔ akayala omboledi wa Babilɔna.

Ɔnɔnyi ɔtɔi l’ɔkɔngɔ, Kurɔ akewoya ɔnɛ: ‘Jehowa ambombutɛ dia mbika tɛmpɛlɔ kande nto la Jɛrusalɛma. Onto tshɛ lalanga tosha lonya atshu.’ Ɔnkɔnɛ, paka oko wakalake Jehowa, ase Juda efula wakakalola lakawɔ ɛnɔnyi 70 l’ɔkɔngɔ wa Jɛrusalɛma ndanyema. Kurɔ akakaloya akɔhɔ wa paonyi la wa mfɛsa ndo diangɔ dikina diakɔshi Nɛbukadinɛza oma lo tɛmpɛlɔ. Shi wɛ ambɛna woho wakakambe Jehowa la Kurɔ dia nkimanyiya ekambi Ande?