Pati pajumpha nyengu, Beleshazara wanguja fumu ya Babiloni. Zuŵa linyaki ndi usiku, wangudana ŵanthu 1 sawuzandi wo ŵenga ndi maudindu ku Babiloni kuti akachiti phwandu. Iyu wangukambiya ateŵeti ŵaki kuti ato makapu ngagolidi ngo Nebukadanezara wanguto munyumba yakusopiyamu yaku Yehova. Beleshazara ndi alendu ŵaki angumwiya mumakapu ngenanga ndipu anguthamika achiuta ŵawu. Mwamabuchibuchi, janja linguwoneka ndipu lingwamba kulemba mazu ngakuziziswa pachimati muchipinda cho aryiyangamu.

Beleshazara wanguchita mantha. Iyu wangudana amasenga ŵaki ndipu wanguŵalayizga kuti: ‘Yo wakambengi vo mazu yanga ngang’anamuwa, wajengi wachitatu ndipu waŵengi ndi udindu ukulu mu Babiloni.’ Amasenga wo angwesa kweni pengavi yo wangukamba vo mazu ngo ngang’anamuwanga. Pavuli paki, kunguza fumukazi ndipu yingukamba kuti: ‘Pe munthu munyaki zina laki Danyele yo wafwatuliyanga malotu ngaku Nebukadanezara. Iyu wangakukambiyani vo mazu yanga ngang’anamuwa.’

Danyele wanguza kuzikumana ndi fumu Beleshazara. Iyu yingukamba kuti: ‘Asani ungafiska kuŵerenga ndi kufwatuliya mazu yanga, ndikupasengi nekelesi yagolidi, ujengi wachitatu ndipu uŵengi ndi udindu ukulu mu Babiloni.’ Danyele wanguti: ‘Ndipenja mphasu zinu cha, kweni ndikukambiyeningi vo mazu yanga ngang’anamuwa. Awusemwi, a Nebukadanezara ŵenga akujikuzga ndipu Yehova wanguŵasisa. Imwi muziŵa vo vinguŵachitikiya kweni muleke dala kutumbika Yehova. Mutumwiya vinyu mumakapu ngagolidi ngo ngakutoleka mu nyumba yakusopiyamu. Mwaviyo, Chiuta walemba mazu yanga ngakuti: Mene, Mene, Tekel, Parsin. Kung’anamuwa kuti Amede ndi Aperese azamuthereska Babiloni ndipu yimwi mujengi so fumu cha.’

Vawonekanga kuti pengavi yo watingi wathereskengi Babiloni. Musumba uwu wenga wakuvikilirika ndi mpanda wakukho ndipuso msinji wo wenga ndi maji nganandi. Usiku  weniwo, Amede ndi Aperese anguyukiya Babiloni. Fumu Sirusi ya Perese yingupatusa maji nga mumsinji kuti asilikali ŵaki akafiki ku mageti nga msumba wenuwu. Ŵati afika, angusaniya kuti mageti ngenga ngakujulika! Asilikali wo angusere mukati, anguthereska msumba wo ndipu angubaya fumu. Pavuli paki, Sirusi ndiyu wanguja fumu ya Babiloni.

Chaka chechendamali, Sirusi wangupharazga kuti: ‘Yehova wandikambiya kuti nkhazengi so nyumba yaki yakusopiyamu ku Yerusalemu. Ŵanthu ŵaki wosi wo akhumba kuwovya angaluta.’ Mwaviyo, nge mo Yehova wangulayizgiya, Ayuda anandi anguwere kwawu pati pajumpha vyaka 70 kutuliya po Yerusalemu wangubwangandulikiya. Sirusi wangutumiza makapu ngagolidi ndi ngasiliva kweniso viyaŵi vinyaki vo Nebukadanezara wanguto munyumba yakusopiyamu. Kumbi wawona mo Yehova wanguwovye ŵanthu ŵaki mwakugwirisiya ntchitu Sirusi?