Mukuya kwachiindi, Bbelisazari wakazooba mwaami wakuBbabbiloni. Bumwi buzuba mansiku, wakachita pobwe alimwi wakatamba bantu biingi bakali azyuuno mubwaami bwakwe. Wakabuzya babelesi bakwe kuti bayete nkomesi zyangolida zyakeetedwe aNebbukkadinezari kuJerusalemu mutempele lyaJehova. Bbelisazari abeenzinyina bakanywida munkomesi eezyo kabatembawula baleza babo. Muchiindi eecho, kwakaboneka kuboko kwamuntu kakulikulemba mabala atabaliki kumuduli wang’anda yakulida.

Bbelisazari wakayoowa. Wakayita basondi mpawo wakabasyomezya kuti: ‘Kufumbwa muntu uyoopandulula mabala aaya, ndiyoomuchita kuti abe watatu mubweendelezi bwakuBbabbiloni.’ Bakeezya pesi taakwe wakakonzya kwaapandulula mabala aayo. Mukayintu wamwaami wakanjila, mpawo wakati: ‘Kuli muntu utegwa Daniyele wakali kupandulwida Nebbukkadinezari makani mayumu. Ulakonzya kukupandulwida mabala aaya.’

Daniyele wakasika kunembo lyamwaami. Bbelisazari wakamubuzya kuti: ‘Ikuti wakonzya kubala akundipandulwida mabala aaya, uyoosamikwa luwenje lwangolida munsingo alimwi uyooba wachitatu mubweendelezi bwakuBbabbiloni.’ Mpawo Daniyele wakati: ‘Tandiziyandi zipo zyako, pesi ndiyookupandulwida zyaambwa amabala aaya. Wuso Nebbukkadinezari wakali kulisumpula alimwi Jehova wakamufwiinsya. Ulizizi zyoonse zyakamuchitikila, pesi anduwe tulikumulemeka pe Jehova nkaambo watola nkomesi zyangolida zyakazwa mutempele Lyakwe akunywida wayini mulinzizyo. Nkinkaako, Leza walemba mabala aaya ati: Mene, Mene, Tekel Uparsin. Mabala aaya aamba kuti, maMede amaPersiya bazoozunda muunzi waBbabbiloni alimwi bwaami bwako buyoomana.’

Kwakali kubonekaanga taakwe muntu wakali kuzoozunda muunzi waBbabbiloni. Nkaambo muunzi ooyu wakakwabilidwe amiduli iisimide amulonga. Pesi mubusiku oobo, maMede amaPersiya bakasika kuti bazoolwane muunzi  ooyo. Mwaami wakuPersiya wakali kutegwa Kkoresi, wakapambula mulonga kuchitila kuti basilumamba bakwe bakonzye kuzubuka akuti bakanjile mumilyango yamuunzi. Nibakasika, bakajana milyango ilibukwazi! Basilumamba bakanjila mumuunzi mpawo bakawuzunda akujaya mwaami. Kuzwa waawo, Kkoresi wakaba mwaami wakuBbabbiloni.

Kawutanayinda munyaka, Kkoresi wakaambilizya kuti: ‘Jehova wandituma kuti nkayakulule tempele lyakwe lili kuJerusalemu. Bantu boonse bayanda kugwasilizya balakonzya kwiinka.’ MaJuda akabweeda kuJerusalemu nikwakiinda minyaka iili 70 mbuli mbaakasyomezezye Jehova. Kkoresi wakabweedezya nkomesi zyangolida azyansiliva azimwi zibelesyo Nebbukkadinezari nzyaakabwezede kutempele. Wayibona na nzila Jehova njaakafutulaayo bantu bakwe kabelesya Kkoresi?