Ekʼ ja tyempo, ja Belsasar yeʼn kʼot ja mandaranum ja bʼa Babilonia. Jun akwal, skʼulan jun kʼin bʼa sloko mil ja matik jel chaʼanyabʼale ja bʼa chonabʼi. Sjeka ja yaʼtijumik bʼa yijeljan ja basoʼik bʼa oro bʼa yiʼojan ja Nabucodonosor bʼa stemplo ja Jyoba. Ja Belsasar soka sloki yawe makunuk ja basoʼik jaw bʼa yujel sok yaweyi stoyjel ja sdyose. Junta chʼaykʼujol, ja bʼa sat naʼits sjeʼa sbʼaj ja skʼabʼ jun winik bʼa och stsʼijbʼuk jujuntik yaljel mi xnaxi stojolil.

Ja Belsasar jel xiw juntiro. Spaya ja skʼintanumiki sok skʼapayi: «Ja maʼ xyalakabʼ ja stojolil ja yaljelik it, ojni ka kʼotuk ja yoxil winik mas chaʼanyabʼalil ja bʼa Babilonia». Ja yuj sleʼawe modo, pe mini bʼobʼyujile. Anto tixa kʼot ja ixawali sok yala: «Jun winik sbʼiʼil Daniel xcholoyabʼ ja jastik junuk ja Nabucodonosor. Ja yeʼn oj bʼobʼ yalawabʼ jas stojolil ja yaljelik it».

Ja Daniel waj yil ja mandaranumi. Yajni kʼoti, ja Belsasar yala yabʼ: «Ta bʼobʼa kʼumuk sok bʼobʼa chol ja yaljelik it, oj kawi jun ujal bʼa oro sok oj ka kʼotan ja yoxil winik mas chaʼanyabʼalil ja bʼa Babilonia». Ja Daniel sjakʼa: «Mi xkʼana oja waki majtanal. Pe oj kalawabʼ jas wa stojolan ja yaljelik it. Jawa tati, ja Nabucodonosor, jel niwan yaʼa sbʼaj, soka Jyoba ya snebʼ jastal chʼin oj ya sbʼaj. Wani xa naʼa spetsanil ja jas ekʼ sbʼaji, pe ama jachuk mi akisa ja Jyoba. Wa makunuk ja basoʼik bʼa oro ja bʼa stemplo ja Jyoba bʼa yujel vino. Ja yuj ja Dyos stsʼijbʼunej ja yaljelik it: MENÉ, MENÉ, TEQUEL sok PARSÍN. Ja jaw wa stojolan ja swinkil Media sok Persia oj sbʼajukekan ja Babilonia, sok mixa weʼn oj ajyan mandaranum».

Lajansok mini maʼ oj bʼobʼ xchʼak ajyi ja Babilonia. Ja chonabʼi talnubʼal lek yuj niwak bardaʼik sok jun chaʼan yok jaʼ. Pe ja akwal jaw, ja swinkil Media sok Persia xchʼakawe. Ja Ciro, ja mandaranum bʼa  Persia, sleʼayi pilan sbʼej ja yok jaʼi bʼa jachuk ja kʼakʼanumiki bʼobʼ kʼotuke ja bʼa spwertaʼil ja chonabʼi. Yajni kʼotye, ¡jaman staʼawe! Ja kʼakʼanumiki wegoxta ochye, xchʼakawe ja chonabʼi sok smilawe ja mandaranumi. Jaxa Ciro yeʼnxa ochkan mandaranum ja bʼa Babilonia.

Ja sbʼajtanil jabʼil ja bʼa smandaranel, ja Ciro yala: «Ja Jyoba yalunejkabʼ oj cha ka kʼeʼuk ja stemplo bʼa Jerusalén. Ja judíoʼik bʼa wa skʼana oj koltanuke oj bʼobʼ wajuke». Ja yuj, jitsan bʼa yeʼnle kumxiye bʼa slujmale yajni ekʼta 70 jabʼil chʼakel ja Jerusalén. Jach kʼot ja jas skʼapunej ja Jyoba. Chomajkil, ja Ciro ya kumxuk ja basoʼik bʼa oro sok bʼa plata, soka tuk jastik yijan ja Nabucodonosor ja bʼa templo. ¿Awila maʼ jastal ja Jyoba ya makunuk ja Ciro bʼa skoltajel ja xchonabʼi?