Үе эрткенде, Валтасар Вавилоннуң хааны апарган. Бир кежээ ол улуг найыр-дой эрттирип, ынаар күрүнениң муң-муң хүндүткелдиг улузун чалап алган. Дой үезинде Валтасар чалчаларынга Иегованың өргээзинден Навуходоносорнуң ап алган алдын саваларын эккелдирткеш, аңаа кызыл араганы ижип, бурганнарын алдаржыдып турган. Хенертен кижи холу көстүп келгеш, ханага билдинмес сөстер бижип эгелээн.

Валтасар аажок коргуп, илби-шидичилерин кыйгырткаш: «Бо сөстерниң утказын тайылбырлап бээр кижини Вавилонга мээң соомда үш дугаар чагырыкчы кылып каар мен» — деп аазаан. Кым-даа ооң утказын тайылбырлап чадап каан. Ооң дугайында кадын дыңнааш: «Чалчаларың аразында Навуходоносорнуң дүштерин, тывызыктарын тайылбырлап чораан Даниил дээр кижи бар. Ол ону тайылбырлап шыдаар» — дээн.

Даниилди эккээрге, Валтасар аңаа: «Бо бижиктиң утказын тайылбырлаптар болзуңза, алдын илчирбени бээр мен база Вавилонга мээң соомда үш дугаар улуг эргелиг кижи боор сен» — дээн. Даниил аңаа чугаалаан: «Меңээ хаанның белектери херек чок, ынчалза-даа бо бижиктиң утказын тайылбырлап бээр мен. Ачаңар Навуходоносор өрү көрдүнүп чораан, ынчалза-даа Иегова ону томаарткан. Ону билир хиреңерде, Иегованы куду көрүп, өргээден эккелген алдын савалардан ижип турдуңар. Ынчангаш Бурган „Мене, мене, текел, парсин“ деп сөстерни бижээн. Ооң утказы мындыг: мидий болгаш перс чоннар Вавилонну эжелеп алыр, а силерниң хаан эргеңерни казыыр».

Вавилонну кым-даа эжелеп ап шыдавас ышкаш турган, чүге дизе ооң ханалары дыка кылын, а чанынга терең хем агып чыткан.  Ынчалза-даа ол-ла дүне мидийлер, перстер хоорайже халдап кире берген. Перстерниң хааны Кир хемни кургадыптарга, дайынчылары хоорайның хаалгазынче кылаштап чеде берген. Солун чүүл, хаалга ажык болган! Дайынчылар Валтасар хаанны өлүргеш, хоорайны эжелеп алган. Шак ынчаар Кир Вавилоннуң чагырыкчызы апарган.

Чыл безин четпээнде: «Иегова меңээ Иерусалимде өргээни катап тударын айыткан. Аңаа дуза кадыксаар еврейлер ынаар барып болур» — деп, Кир чарлаан. Шак ынчаар Бурганның аазааны ёзугаар Иерусалимниң буурап дүшкенинден бээр 70 чыл эрткенде, хөй еврейлер чанар аргалыг апарган. Навуходоносор хаанның өргээден алгаш барган алдын, мөңгүн саваларын база өске-даа чүүлдерин Кир еврейлерге эгидип берген. Ынчалдыр Иегова Кирни ажыглап, чонунга дузалаан.