Nga u ya ha tshifhinga, Belesatsara, a vha khosi ya Babele. Nga vhuṅwe vhusiku, a ramba vhaḓivhalea vha zwigidi vha henefho shangoni uri vha ḓe tshimimani. A laedza vhashumeli vhawe u ri vha ḓe na khaphu dza musuku dze Nebukadanetsara a dzi dzhia thembeleni ya Yehova. Belesatsara na vhaeni vhawe vha nwa nga dzenedzo khaphu nahone vha hulisa midzimu yavho. Nga u ṱavhanya, ha vhonala tshanḓa tsha munna nahone tsha thoma u ṅwala maipfi a sa pfali kha luvhondo lwa nnḓu ya u ḽela.

Belesatsara o tshuwa vhukuma. Vha vhidza vhadzia manditi nahone a vha fulufhedzisa a ri: ‘Arali ha nga vha na ane a ṱalutshedza haya maipfi, ndi ḓo mu ita munna wa maanḓa wa vhuraru kha ḽa Babele.’ Vha lingedza, fhedzi a huna we a kona u ṱalutshedza eneo maipfi. Mufumakadzi wa khosi a ḓa ha ene a ri: ‘Hu na munna ane a pfi Daniele we a vha a tshi ṱalusa zwithu kha Nebukadanetsara. A nga ṱalutshedza haya maipfi.’

Daniele a ḓa ha khosi. Belesatsara a ri khae: ‘Arali na nga kona u vhala na u ṱalutshedzela haya maipfi, ndi ḓo ni fha vhulungu ha musuku nahone nda ni ita munna wa vhuraru wa maanḓa kha ḽa Babele.’ Daniele a ri: ‘A thi ṱoḓi zwifhiwa zwavho, fhedzi ndi ḓo vha vhudza zwine haya maipfi a amba zwone. Khotsi avho Nebukadanetsara vho vha vha tshi ḓikukumusa, nahone Yehova a vha ṱukufhadza. Vha a ḓivha zwoṱhe zwe zwa bvelela khavho, fhedzi vha nyadza Yehova nga u nwa waini nga khaphu dza musuku dzi bvaho thembeleni yawe. Nga u ralo Mudzimu o ṅwala haya maipfi: ‘Mene, Mene, Tekel, Upharsin. Haya maipfi a amba uri Vhameda na Vhaperesia vha ḓo kunda Babele, nahone vhone vha ḓo dzhielwa vhuhosi.’

Zwo vha zwi tshi vhonala u nga a huna ane a nga kunda Babele. Hoyu muḓi wo vha wo tsireledzwa nga luvhondo lwo khwaṱhaho na nga mulambo wo tsaho. Fhedzi nga  honoho vhusiku, Vhameda na Vhaperesia vha vha vutshela. Korese Khosi ya Vhaperesia ya pambusa mulambo u itela uri maswole a kone u tshimbila a gonyele getheni dza muḓi. Misi vha tshi swika henefho, gethe dzo vha dzo vulea. Mmbi ya dzhena, ya kunda muḓi, nahone khosi ya vhulahwa. Korese a vha ene muvhusi wa Babele.

Hu sa athu fhela ṅwaha, Korese a ḓivhadza a ri: ‘Yehova o mmbudza uri ndi vusuluse thembele ngei Yerusalema. Muṅwe na muṅwe kha vhathu vhawe ane a ṱoḓa u ya u thusa a nga ṱuwa.’ Samusi Yehova o fulufhedzisa, vhunzhi ha Vhayuda vho humela hayani nga murahu ha miṅwaha ya 70 Yerusalema wo fheliswa. Korese a vhuyedzedza khaphu dza musuku na dza siliva na dziṅwe thundu zwe Nebukadanetsara a zwi dzhia thembeleni. Naa ni a kona u vhona nḓila ye Yehova a shumisa ngayo Korese u thusa vhathu vhawe?