Paglabay han panahon, hi Belsasar an nagin hadi ha Babilonya. Usa ka gab-i, nag-imbitar hiya hin 1,000 han pinakaimportante nga mga tawo ha iya nasasakopan para ha usa nga piyesta. Nagsugo hiya nga dad-on ha iya an bulawan nga mga kopa nga ginkuha ni Nabukodonosor ha templo ni Jehova. Gin-gamit ito ni Belsasar ngan han iya mga bisita ngan gindayaw an ira mga dios. Pero tigda la, nakakita hira hin kamot nga nagsusurat hin misteryoso nga mga pulong ha bungbong.

Nahadlok hi Belsasar. Ginpatawag niya an iya mga madyikero ngan nagsaad: ‘Bisan hin-o nga makagsaysay hini nga mga pulong hihimoon ko nga ikatulo nga pinakagamhanan nga tawo ha Babilonya.’ Naniguro an mga madyikero pero waray nira ito maisaysay. Tapos, kinadto an rayna ngan nagsiring: ‘May lalaki nga Daniel an ngaran nga paragsaysay kan Nabukodonosor han sugad hini nga mga butang. Maisasaysay niya ini ha imo.’

Kinadto hi Daniel ha hadi. Hi Belsasar nagsiring: ‘Kon mabasa ngan maisaysay mo ini nga mga pulong, tatagan ko ikaw hin bulawan nga kwintas ngan hihimoon ko ikaw nga ikatulo nga pinakagamhanan nga tawo ha Babilonya.’ Hi Daniel nagsiring: ‘Diri ko kinahanglan an imo mga regalo, pero isusumat ko an kahulogan hini. An imo tatay nga hi Nabukodonosor hambog ngan ginpaubos hiya ni Jehova. Maaram ka han tanan nga nahitabo ha iya, pero waray mo respetoha hi Jehova kay gin-gamit mo pag-inom hin bino an bulawan nga mga kopa tikang ha Iya templo. Salit iginsurat han Dios ini nga mga pulong: Mene, Mene, Tekel, ngan Parsin. Nagpapasabot ini nga an Babilonya sasakupon han Media ngan Persia, ngan diri ka na magigin hadi.’

Baga hin imposible masakop an Babilonya. An syudad napapalibotan hin magdakmol nga pader ngan hilarom  nga salog. Pero hito mismo nga gab-i, sinulong an kasundalohan han Media ngan Persia. Ginpasimang ni Hadi Ciro han Persia an salog basi makakadto an iya mga sundalo ha mga ganghaan han syudad. Pag-abot nira, abrido ito! Ginsulod dayon nira an syudad, ginsakop ito, ngan ginpatay an hadi. Katapos, hi Ciro an nagin magmarando ha Babilonya.

Paglabay hin mga usa ka tuig, hi Ciro nagpahibaro: ‘Ginsugo ako ni Jehova nga tukuron utro an iya templo ha Jerusalem. Puydi kumadto an bisan hin-o ha iya katawohan nga naruruyag pagbulig.’ Salit sugad han iginsaad ni Jehova, damu nga Judio an nakauli ha Jerusalem paglabay hin 70 ka tuig tikang han nabungkag ito. Iginpabalik ni Ciro an bulawan ngan silber nga mga kopa nga ginkuha ni Nabukodonosor ha templo. Nakita mo ba kon paonan-o gin-gamit ni Jehova hi Ciro ha pagbulig ha Iya katawohan?