Mkupita kwandaŵi Belisasala jwaŵele mwenye jwa Babulo. Lisiku line cilo, jwalakwe jwaŵilasile ŵandu ŵakumanyikwa mnope ŵa m’cilamboco ku cindimba. Jwalakwe jwalamwile ŵakutumicila ŵakwe kuti akajigale yikapu ya golidi yaŵayijigele Nebukadinesala m’nyumba jakulambilila Yehofa. Belisasala yalumo ni ŵandu ŵaŵaŵilasile ŵala, ŵatandite kumwa pakamulicisya masengo yikapu yila kwineku ali mkujilumba milungu jawo. Kaneko patendekwe cakusimonjesya. Ligasa lya mundu lyawonecele m’cipinda ciŵatendelaga cindimbaco lili mkulemba pepupa maloŵe gakusawusya kugapikanicisya.

Belisasala wamkamwile woga. Jwalakwe ŵaŵilasile ŵamasenga ŵaŵamtumicilaga ni ŵasalile kuti, ‘Jucakombole gopolela maloŵega, caciŵa jwatatu kwa ŵandu ŵakwete ulamusi mnope m’Babulo.’ Jemanjajo ŵalinjilile, nambo pangali juŵakombwele gopolela maloŵego. Kaneko ŵamkwawo mwenye ŵayice ni ŵasalile kuti, ‘Pana jwamlume jwine lina lyakwe Daniyele juŵamkamucisyaga mwenye Nebukadinesala kupikanicisya yindu. Jwalakwe mpaka ŵagopolele maloŵega.

Daniyele jwayice kwa mwenyejo. Belisasala ŵamsalile Daniyele kuti, ‘Naga mkombole kuŵalanga soni gopolela maloŵega, cinjimpa mkufu wa golidi soni cimciŵa jwatatu kwa ŵandu ŵakwete ulamusi mnope m’Babulo. Daniyele jwajanjile kuti, ‘Ngangusaka mituka jenu, nambope cinamsalile kagopolele ka maloŵega. Nebukadinesala, baba ŵenu ŵaliji ŵakulikwesya, nambo Yehofa ŵatulwisye. Mkumanyilila yosope yayatendecele, nambo mnyosisye Yehofa mwa kumwa finyo pakamulicisya masengo yikapu ya kunyumba jakulambilila Yehofa. Sambano Mlungu alembile maloŵe aga, Mene, Mene, Tekel ni Parsin. Maloŵega gakugopolela kuti, Amedi ni Apelesi cacigomeka Babulo, soni wawojo ngasaŵa mwenye.’

Pandaŵijo yawonekaga kuti pangali jwakakombwele kugomeka Babulo. Lutenje lwakulimba soni lusulo lwakusokoka lwacenjelaga msindawu kwa acimmagongo  ŵawo. Nambo cilo cicoco, Amedi ni Apelesiya ŵawujimucile msindawo. Mwenye jwa Pelesiya, Kolesi, jwasepwisye lusulolo kuti asilikali ŵakwe akombole kupita mpaka kucipata ca msindawo. Paŵayice, ŵacisimene cipata cili cangawugala. Pelepo asilikaliwo ŵagambile kwinjila ni kuwugomeka msindawo, mwamti mwenye ŵala ŵawulajidwe.

Caka mkanicimale, Kolesi jwapelece cimanyisyo cakuti, ‘Yehofa asalile kuti ndaŵesoni nyumba jakwe jakulambilila ku Yelusalemu. Ŵandu ŵa Yehofa ŵakusaka kamucisya masengoga, komboleka kwawula.’ Mwakamulana ni yaŵasasile Yehofa, Ayuda ŵajinji ŵawujile kumangwawo pali pamasile yaka 70 Ababulo cijonanjile Yelusalemu. Kolesi ŵawucisye yikapu ya golidi soni ya silifa, soni yindu yine yaŵayikamulicisyaga masengo Nebukadinesala yaŵajigele kunyumba jakulambilila. Ana pelepa mkuyiwona yaŵatite Yehofa pakwakamucisya ŵandu ŵakwe kupitila mwa Kolesi?