Ka máan kʼiineʼ Belsasar tu beetaj u reyil Babilonia. Junpʼéel áakʼabeʼ tu beetaj janal utiaʼal mil máakoʼob. Le máakoʼobaʼ letiʼe maas kʼaj óolaʼanoʼob teʼ luʼumiloʼ. Tu yaʼalaj ka jóoʼsaʼak le vasoʼob de oro tu chʼaʼaj Nabucodonosor tu templo Jéeobaoʼ. Belsasar yéetel le máaxoʼob u invitartmoʼ meyajnajtiʼob le vasoʼob utiaʼal u yukʼloʼoboʼ, tsʼoʼoleʼ ka joʼopʼ u alabartik u diosoʼob. Chéen ka ilaʼab u chíikpajal u kʼab juntúul máak táan u tsʼíibtik tʼaanoʼob maʼ tu naʼataʼal teʼ pakʼoʼ.

Belsasareʼ jach sajakchaji. Tu tʼanaj le máaxoʼob jach yaan u naʼatoʼoboʼ, ka tu yaʼalajtiʼob: ‹Le máax kun tsolikten le baʼax ku yaʼalik le tʼaanoʼobaʼ, yaan u kʼuchul u beetuba le óoxtúul máak maas kʼaj óolaʼan Babiloniaoʼ›. Letiʼobeʼ tu yóotaj u tsoloʼob baʼax u kʼáat u yaʼale, chéen baʼaleʼ mix juntúul béeychaj u tsolikiʼ. Ka kʼuch le reinaoʼ tu yaʼalaj: ‹Juntúul máak ku kʼaabaʼtik Danieleʼ ku tsolik kaʼach tiʼ Nabucodonosor baʼax u kʼáat u yaʼal le baʼaxoʼob ku wayakʼtikoʼ. Letiʼeʼ jeʼel u yaʼaliktech baʼax u kʼáat u yaʼal le tʼaanoʼobaʼ›.

Danieleʼ bin u yil le reyoʼ. Ka kʼucheʼ, Belsasareʼ tu yaʼalajtiʼ: ‹Wa teech ka xokik yéetel ka tsolik le tʼaanoʼobaʼ, yaan in tsʼáaiktech junpʼéel collar de oro yéetel yaan a kʼuchul a beetaba le óoxtúul máak maas kʼaj óolaʼan Babiloniaoʼ›. Danieleʼ tu núukajtiʼ: ‹Maʼ in kʼáat ka a síiten mix baʼaliʼ. Chéen baʼaleʼ yaan in waʼaliktech baʼax u kʼáat u yaʼale. Nabucodonosor, a papaeʼ, jach nojbaʼal u taaskuba kaʼachi. Chéen baʼaleʼ Jéeobaeʼ tu kaʼansajtiʼ unaj u yeʼesik kabal óolal. Techeʼ kex a wojel baʼax úuch tiʼ a papaeʼ, maʼ ta weʼesaj tsiikil tiʼ Jéeobaiʼ. Ta wukʼaj vino teʼ vasoʼob de oro yaan kaʼach tu templo Jéeobaoʼ. Le oʼolaleʼ Dioseʼ tsʼoʼok u tsʼíibtik le tʼaanoʼobaʼ: MENÉ, MENÉ, TEQUEL yéetel PARSÍN. Lelaʼ u kʼáat u yaʼaleʼ le medoʼob yéetel le persaʼoboʼ yaan u chʼaʼikoʼob u kaajil Babilonia, tsʼoʼoleʼ yaan u xuʼulul a beetik a reyil›.

Bey mix máak kaʼach jeʼel u ganartik Babiloniaeʼ. Le kaajaʼ kanáantaʼan kaʼach tumen kaʼanal baʼpakʼoʼob yéetel tumen  junpʼéel río jach taam u jaʼil. Chéen baʼaleʼ teʼ áakʼaboʼ, le medoʼob yéetel le persaʼoboʼ ook u baʼateltoʼob le kaajoʼ. Ciro, u reyil Persiaeʼ, tu beetaj u bin yaanal tuʼux u jaʼil le río utiaʼal ka kʼuchuk le soldadoʼob tak tu joonajil le kaajoʼ. Ka kʼuchoʼobeʼ, ¡jeʼekʼab u joonajiloʼob! Le soldadoʼoboʼ tu séebaʼanil tu káajsoʼob le baʼateloʼ, tu chʼaʼajoʼob le kaajoʼ ka tu kíimsoʼob le reyoʼ. Ka tsʼoʼokeʼ Ciro tu beetaj u gobernanteil Babilonia.

Tu yáax añoil káajak u gobernar Ciroeʼ, tu yaʼalaj: ‹Jéeobaeʼ tsʼoʼok u yaʼalikten ka in jeʼel líiʼs u templo tu kaajil Jerusalén. Le judíoʼob u kʼáatoʼob áantajeʼ, jeʼel u páajtal u binoʼobeʼ›. Le oʼolal yaʼab tiʼ letiʼobeʼ suunajoʼob Jerusalén le tsʼoʼok u máan 70 años xuʼulsaʼakoʼ. Bey úuchik u béeytal le baʼax tu yaʼalaj Jéeobaoʼ. Ciroeʼ tu sutaj le vasos de oro yéetel de plata bey xan le uláakʼ baʼaloʼob tu chʼaʼaj Nabucodonosor teʼ templooʼ. ¿Ta wilaj wa bix úuchik u meyaj Ciro tiʼ Jéeoba utiaʼal u kanáantik u kaajal?