Kusa Beresasara ada ni bakindo Babera. Rogo yuru sa, ko ayambu kutu nyanyakipa aboro rogo ringara i ye tipa pumbo. Ko aya fu gako amoyambu i ye na agu ainga nga ga dahabu Nebukadenesara adihe rogo ga Yekova yekaru yo. Beresasara na gako agino aambirahe rogo agu ainga re na kini tambua gayo ambori. Wakina ikpirogumba, be boro akuru ki tona ka ke iˈiriwo afugo ti kpoto gu bambu i ari riahe rogoho.

Gunde ki zi Beresasara ni kerehe. Ko ki yambu gako abinza na ki kido yo nga: ‘Ka boro sakirogo gi kekeapai re fere, mi nika maa ni ni biata kikiipa boro rogo gu ringara nga ga Babera.’ I amangi ome tipa ka gedaha, ono ka i arengbanga na gedaha ya. Fuani, nakindo ki ye ki ya: ‘Kumba gudu ho du rimoko nga Daniere, ko anaasaka apai fu Nebukadenesara. Ko ima rengba ka sakarogo gipai re foro.’

Daniere ki ye fuo Bakindo. Beresasara ki ya fuko: ‘Ka mo gedi agi afugo re na ki sakirogoyo fere, mi nika fu azogbo dahabu foro na ki saro ni biata nyanyakipa boro rogo Babera.’ Daniere aya: ‘Mi aidanga gamo agamahe te, ono mi nika pe rogo agi afugo re foro. Bamo nangia Nebukadenesara angia irarukö, na Yekova ki umbasi ko. Mo ima ino agu apai naabaha namangi ko, ono mo basa Yekova ni mbira mo imekakue ti ngba gako ainga nga ga dahabu naadu rogo gako yekaru yo. Sidu, Mbori ima ke agi afugo re nga: Mene, Mene, Tekere, na Uparusina. Agi afugo re naida ka ya, aMadaio na aParaso nika zio gi ringara nga ga Babera re, na mo adunga ni bakindo berewe te.’

Si aangera wa Boro ho rengbe ka zio Babera te. Gi gbata re adu ni bandabandaha be bakere nanaga ndugu gbiati dudunguro ime. Ono rogo gu yuru re, aMadaio na aParaso azubo ho. Bakindo aParaso nangia Kurese aˈaria ngba ime si ni fu ku rogo gu kura ba kia  tipa gako asekere si kina boro ngbadimo dungu Babera. Ho i asi ni koyo, ngbadimo dungu adu ni kina zakizakihe! Asekere arimi koyo na ki zi gu gbata re, na ki imi bakindo. Fuani, Kurese ki da ni Bakindo Babera.

Vuru garãyo sa, Kurese atakipandepai nga: ‘Yekova ya fere mi me gako yekaru berewe kubaha Yerusarema yo. Gu gako aboro naida ka undo sungehe i ima rengba ka ndu.’ Kina wai Yekova akidohe, dungu aYudo akaragatiyo ku kpuyo yo fuo agarã 70 susi fuo gbarasa yo Yerusarema. Kurese akaraga dahabu na agu ainga gbiati aũsunge Nebukadenesara adihe yekaru yo. Ya mo mo nabi wai Yekova amangisunge na Kurese ko undo gako aboro?