Kabaka mukene me Babilon onongo nyinge Dario ma jo Medi. Dario oniang ni Daniel onongo kwiri adada. En oketo Daniel me loyo wi luloc madito me Babilon. Man oweko nyeko omakogi i kom Daniel ci gucako yenyo yo me neke woko. Gin onongo gingeyo ni Daniel lego bot Jehovah tyen adek nino ki nino, pi man guwaco bot Dario ni: ‘Ai kabaka, wek kiket cik ni dano ducu myero guleg boti keken. Ngat mo keken ma oturo cik man omyero kibol woko i bur ma opong ki labwor.’ Tam man oyomo cwiny Dario, ci oketo cinge me moko cik man.

Cutcut ma Daniel ongeyo ni dong kiketo cik man, en oa ocito i ode. En oyabo wang diricane, ci orumo conge piny olego bot Jehovah. Co ma lunyeko-ni gucorre i ot pa Daniel gunonge ka lega. Gungweco bot Dario ci guwacce ni: ‘Daniel pe tye ka lubo cikki. En bedo ka lego Lubangane tyen adek nino ki nino.’ Dario onongo maro Daniel dok pe mito ni oto woko. En obedo ka tamo pi yo ma etwero laro kwede kwo pa Daniel nio ka ceng opoto. Ento, kadi wa kabaka onongo pe twero loko cik ma en dong otyeko keto cinge iye. Pi man, en omiyo twero bot jone ni gubol Daniel i bur ma opong ki labwor mager.

I dyewor meno, Dario obedo ka paro Daniel mada mumiyo nino okwero mako wange woko. Kudiko  con, en ongweco i dog bur ci odange matek bot Daniel ni: ‘Lubangani mono olaro kwoni?’

Ci Dario owinyo dwan mo. Obedo dwan Daniel! En odange bot Dario ni: ‘Lamalaika pa Jehovah otweyo dog lwak labwor magi woko. Mumiyo pe gumwoda woko.’ Man omiyo Dario obedo ki yomcwiny matek! En omiyo twero ni kikwany Daniel woko ki i bur. Daniel pe onongo kadi latin ret mo i kome wacel. Ci kabaka ociko ni: ‘Wukel jo ma gudoto Daniel-li ci wubolgi woko i kin lwak labwor.’ I kare ma kibologi i bur, labwor omwodogi oturo cogogi woko lipwac pwac.

Lacen, Dario omiyo cik man bot jone: ‘Dano ducu myero gubed ki lworo i nyim Lubanga pa Daniel. En aye ma olaro Daniel ki i teko pa labwor.’

Tika ilego bot Jehovah nino ducu, calo Daniel?