Media markatäkäna uka Dariow Babilonia apnaqarakïna. Darío reyejja Danielarojj mayninakat sipansa jukʼamp yatiñanitwa uñjäna, ukatwa munañani jaqenakar uñjañapatakejj jupar uttʼayäna. Uka munañan jaqenakajj wal Danielat envidiasipjjäna, jiwayañwa munapjjarakïna. Daniel profetajj kimsa kutiw mä urun orasirïna, uk yatisaw uka jaqenakajj Darío reyir akham sapjjäna: ‘Jachʼa rey, jaqenakajj juma saparuk orasipjjañapatak mä ley apsum. Khititï uka ley jan phoqkani ukajja leonanakajj jakapki uka pʼiyar jaqontatäpan’ sasa. Dariorojj uka leyejj gustänwa, ukatwa firmantäna.

Daniel profetajj uka machaq leyit yatïna ukhajja, utaparuw sarjjäna. Ventanap jistʼarasisajj qonqortʼasisaw Jehová Diosar orasïna. Jupar uñisiri jaqenakajja akatjamat utapar mantasaw orasiskiri katjapjjäna. Ukatjja Darío reyir akham sasin awisiriw tʼijupjjäna: ‘Daniel jaqejj janiw istʼktamti. Kimsa kutiw mä urun Diosapar orasi’ sasa. Darío reyejj Danielar suma jaqetwa uñjäna, janirakiw jiwayañ munkänti. ‘Jupar salvañatakejj kunsa lurirista’ sasaw uka urunjja jaypʼukam wal lupʼïna, firmatäjjäna uka leyjja janiw jupas mayjtʼayañ puedkänti. Jan kamachañ puedjjasinjja, leonanakajj jakapkäna uka pʼiyaruw Danielar jaqontayäna.

 Uka arumajja Dariojj walpun Danielat llakisïna, janirakiw ikthapkänti. Alwajj Danielan ukaruw tʼijüna, akham sasaw artʼarakïna: ‘¡Daniel! ¿Diosamajj salvtamti?’ sasa.

Dariojj mä aru istʼäna. Daniel profetaw akham sasin jaysanïna: ‘Jehová Diosan angelapaw leonanakan lakap jistʼanti, janiw kamachapkitusa’ sasa. Dariojj wal kusisïna, apsuyjjarakïnwa. Daniel profetajj jan kuna kamachtʼataw mistunïna. Ukatjja reyejj akham sänwa: ‘¡Danielar juchañchirinakarojj aka pʼiyar jaqontapjjam!’ sasa. Jaqontapjjäna ukhajj jankʼakiw leonanakajj uka jaqenakar manqʼantapjjäna.

Darío reyejj akham sasaw mä mandato markapatak apsüna: ‘Taqeniw Daniel chachan Diosapar respetapjjañama. Jupaw leonanakat Danielar qhespiyi’ sasa.

¿Jumajj Daniel profetjamarakit Jehová Diosar sapür orasta?