Di pudian ni ari, gabe raja ni Babel ma si Darius na sian kota Madai. Lomo do rohana tu si Daniel ala umburju ibana sian na asing. Dipillit si Darius ma si Daniel gabe pengawas ni angka pejabat di negara i. Sogo ma roha ni angka pejabat i jala naeng dibunu ma ibana. Diboto nasida do martangiang si Daniel tu Jahowa tolu hali sadari. Gabe didok nasida ma tu si Darius, ‘O raja, bahen ma peraturan asa holan tu ho sude jolma martangiang. Manang ise na mangalo, dipamasuk ma tu lubang ni singa.’ Dioloi si Darius ma i, jala ditandatangani.

Dung dibege si Daniel peraturan na baru i, laho ma ibana tu jabuna. Martangiang ma ibana tu Jahowa di jolo ni jandelana na tarbungka. Alai tompu ma masuk angka pejabat i jala diida ma si Daniel martangiang. Dipaboa ma i tu si Darius, didok ma, ‘Dialo si Daniel do ho. Martangiang do ibana tu Debatana tolu hali sadari.’ Alai ndang lomo roha ni si Darius molo dipamate si Daniel. Dilului ma cara paluahon si Daniel. Alai ndang boi be, ala nunga sanga ditandatangani ibana peraturan i. Ujungna, disuru ibana ma asa dipamasuk si Daniel tu lubang ni singa.

 Ndang boi si Darius modom saborngin i mamingkiri si Daniel. Dung manogot, lari ma ibana tu lubang ni singa i. Didok ma, ‘Daniel, dijaga Debatam do ho?’

Dibege si Darius ma soara ni si Daniel. Didok si Daniel ma, ‘Ditutup malaikat ni Jahowa do baba ni angka singa on. Ndang dingatngat ahu agia otik.’ Las ma roha ni si Darius! Didok ma asa dipakaluar si Daniel sian i. Ndang luka ibana. Dung i didok Raja Darius ma, ‘Pamasuk ma na naeng mambunu si Daniel tu lubang ni singa.’ Pintor dingatngat angka singa i ma angka pejabat i tingki dipamasuk tu lubang i.

Dung i didok si Darius ma tu angka rakyatna, ‘Sude halak ingkon pasangaphon Debata ni si Daniel. Dipalua do ibana sian angka singa.’

Martangiang do ho tu Jahowa ganup ari songon si Daniel?