ISAMBILILO 64
Daniele ali mu Cilindi ca Nkalamo
Na umbi uwali imfumu ya bena Babiloni ni Dariusi umwina Medai. Dariusi alimwene ukuti Daniele ali uwaibela. E ico amupeele umulimo wa kwangalila abantu abali abacindama mu Babiloni. Aba bantu tabatemenwe Daniele kabili balefwaya ukumwipaya. Balishibe ukuti Daniele alepepa kuli Yehova imiku itatu cila bushiku, e ico baebele Dariusi ati: ‘Mwe mfumu, bikeniko ifunde lya kuti umuntu onse alepepa kuli imwe epela. Uukakaana ukukonka ili funde akapooswe mu cilindi ca nkalamo.’ Dariusi alisumine ukuti kube ili funde, kabili alisaine apo balembele ili funde.
Ilyo Daniele aumfwile ukuti nabapanga ifunde ilipya, alingile mu ng’anda yakwe. Ailefukama pe windo ilyaiswike, atendeka no kupepa kuli Yehova. Awe balya abaume abashamutemenwe baingile mu ng’anda yakwe kabili bamusangile alepepa. E ico babutukiile kuli Dariusi no kumweba ati: ‘Daniele tacita ifyo mwalanda. Alapepa kuli Lesa wakwe imiku itatu cila bushiku.’ Dariusi alitemenwe Daniele kabili talefwaya ukuti afwe. E ico ubushiku bonse aletontonkanya ifyo engacita pa kuti apusushe Daniele. Lelo takwali umuntu nangu umo, nangu fye ni mfumu, uwali no kwalula ifunde ilyo yasainepo. Awe e fyo imfumu yaebele abantu bakwe ukupoosa Daniele mu cilindi ca nkalamo.
Mu nshita ya bushiku, Dariusi alisakamene sana pali Daniele ica kuti alifililwe no kulaala. Ilyo bwaceele, abutukiile ku cilindi ca nkalamo kabili abilikishe kuli Daniele ati: ‘Bushe Lesa obe nakupususha?’
Awe Dariusi aumfwile ishiwi lya kwa Daniele! Aebele Dariusi ati: ‘Malaika wa kwa Yehova acisala utunwa twa nkalamo, na sho tashincenene.’ Ala Dariusi alitemenwe! E ico aebele abantu ukuti bafumye Daniele mu cilindi. Ilyo Daniele afumine mu cilindi tapali nangu pamo apo inkalamo sha mucenene. Lyena imfumu yaebele abantu ati: ‘Pooseni abaume abalebepesha Daniele mu cilindi ca nkalamo.’ Ilyo aba baume babapoosele mu cilindi, inkalamo shalibaliile bonse.
Lyena Dariusi atumine abakweba abantu bakwe ukuti: ‘Umuntu onse aletiina Lesa wa kwa Daniele. Napususha Daniele ku nkalamo.’
Bushe ulapepa kuli Yehova cila bushiku nga filya Daniele alecita?
“Yehova alishiba ukupokolola bakapepa ku fya kwesha.” —2 Petro 2:9
Nalimo Kuti Mwatemwako ne fi
AMAKARDI
Kardi pali Daniele
Cinshi Daniele bamupooseele mu cilindi ca nkalamo? Kopolola iyi kardi no kusambilila na fimbi pali Daniele.
ULUPUNGU LWA KWA KALINDA
Bushe Bamalaika Kuti Batwafwa?
Bushe tufwile ukupepa kuli bamalaika nga tulefwaya ubwafwilisho?
