Ọba ọvbehe nọ vbe kha yan e Babilọn ọre Dariọs ne Ovbi e Mede. Vbe Dariọs ghi bẹghe ẹre wẹẹ ọmwa nọ hiunsi ẹre Daniẹl khin, ọ na wẹẹ ne ọ gha re ọkaolotu ọghe emwa ni hiunsi vbe ẹvbo nii. Iran kegha gbọvo e Daniẹl, iran na vbe gha gualọ vbene iran khian ya gbe ẹre rua hẹ. Iran rẹnrẹn wẹẹ igba eha ẹre Daniẹl na erhunmwu gie Jehova vbe ẹdẹ, rhunmwuda ọni, iran na ya tama e Dariọs wẹẹ: ‘Umogun, gbe uhi, ne emwa hia gha na erhunmwu gie uwẹ ọkpa. A gha fi ọmwaikọmwa nọ rra uhi na, fi uvun oduma.’ E Dariọs na wa kue yọ, ẹre ọ na mu obọ ye ebe uhi nii.

Vbe Daniẹl ghi họn vbekpa uhi nii, ọ na gha rrie owa. Ọ na ya diguẹ vbe ewindo nọ mu aro daa orere ẹvbo vbe owa ọghẹe, ọ na gha na erhunmwu gie Jehova. Ikpia ni gbọvo ẹre, na do muẹn vbe ọ na erhunmwu. Iran na rhulẹ ya tama e Dariọs wẹẹ: ‘E Daniẹl he ẹmwẹ yọ ruẹ obọ. Ọ ye na erhunmwu gie Osanobua igba eha vbe ẹdẹ.’ E Dariọs ma hoo ne Daniẹl wu, rhunmwuda ọ hoẹmwẹ ọnrẹn ẹsẹsẹmwẹse. Ẹdẹ ohoho ẹre ọ ya gha muẹn roro, vbene ọ gha ya miẹn e Daniẹl fan hẹ. Sokpan, uhi ne ọba mu obọ yi nẹ, ọmwa rhọkpa i khian sẹtin fi ẹre werriẹ. Ọ na ghi wẹẹ na fi e Daniẹl fi uvun oduma ni khọọ.

 E Dariọs ma vbiẹ vbe asọn nii, ne ọ ya gha mu ẹmwẹ e Daniẹl roro. Vbe ẹdẹ ghi gbe, ọ na rhulẹ gha rrie ehe ne uvun nii ye, ọ na datie Daniẹl: ‘Osa ruẹ miẹn ruẹ fan ra?’

E Dariọs ghi ghee, e Daniẹl khuẹnniẹn! Ọ na tama e Dariọs wẹẹ: ‘E Jehova khui unu ọghe avbe oduma. Iran ma ya obọ kan mwẹ.’ E Dariọs na ghọghua! Ọ na wẹẹ na si e Daniẹl ladian vbe uvun oduma. Ama ihiẹn ọkpa ma gha rre Daniẹl egbe. Ọba na ghi wẹẹ na filo ikpia nii, ni gbọvo e Daniẹl fi nene uvun oduma. Iran ma he dele sẹ otọ vbe oduma gua iran rhie.

E Dariọs na ghi yi uhi wẹẹ: ‘Wa hia gha rhie ọghọ ne Osa ọghe Daniẹl. Ọ miẹn e Daniẹl fan vbe uvun oduma.’

Uwẹ na erhunmwu gie Jehova vbe ẹdẹgbegbe vbe na ghee Daniẹl ra?