Mɛdicɛ Dariyusi tun ye Babilonɛ masacɛ wɛrɛ ye. A y’a kɔrɔsi ko Daniyɛli be danna tɔɔw la. A ye Daniyɛli kɛ a ka jamana mɔgɔbaw kuntigi ye. Daniyɛli ɲangoya y’o mɔgɔbaw minɛ ani u tun b’a fɛ k’a kɛ a be tunu ka bɔ yen. Komi u tun b’a lɔn ko Daniyɛli be Jehova deli siɲɛ saba loon o loon, u y’a fɔ Dariyusi ye ko: ‘Masacɛ, a ka ɲi sariya dɔ ka sigi, k’a fɔ ko mɔgɔ bɛɛ ka ele kelenpe bato. Mɔgɔ o mɔgɔ tɛna o sariya labato, o tigi ka fili jaraw cɛma dingɛ kɔnɔ.’ O diyara Dariyusi ye, a y’a bolonɔ bila o sariyasɛbɛ kan.

Daniyɛli y’o sariya kura koo mɛn dɔrɔn, a tagara a ka soo. A y’a kunbiri gwan duguma k’a ɲɛɛ sin finɛtiri dayɛlɛnin ma ani ka Jehova deli. O ɲangow barila ka don a ka boon na k’a sɔrɔ delili la. U bolila ka taga a fɔ Dariyusi ye ko: ‘Daniyɛli ma mɛnni kɛ i fɛ. A b’a ka Ala deli siɲɛ saba loon o loon.’ Daniyɛli koo tun ka di Dariyusi ye ani Dariyusi tun t’a fɛ a ka sa. A miirila tile kuru bɛɛ la k’a filɛ a be se ka Daniyɛli kisi cogo min na. Nka masacɛ y’a bolonɔ bila sariya min kan ka ban, hali ale masacɛ yɛrɛ tɛ se k’o sariya yɛlɛma. A tun ka kan le ka cii di a ka cɛɛw ma u be Daniyɛli fili jara farimanw cɛma dingɛ kɔnɔ.

 O loon sufɛ, Dariyusi tun be hamina Daniyɛli koo la fɔɔ a tɛ se ka sinɔgɔ. A bolila sɔgɔma ka taga dingɛ daa la ani ka Daniyɛli weele k’a fɔ ko: ‘I ka Ala ye i kisi wa?’

Dariyusi ye kaan dɔ mɛn. Daniyɛli tun lo! A ye Dariyusi weele k’a fɔ ko: ‘Jehova ka mɛlɛkɛ ye jara nunu daa siri. U ma foyi kɛ n’ na.’ Dariyusi ninsɔndiyara kosɔbɛ! A ye cii di k’u ka Daniyɛli sama ka bɔ dingɛ kɔnɔ. Daniyɛli fari yɔrɔ si tun ma mandimi. O kɔ masacɛ ye cii di ko: ‘Minw ye Daniyɛli jalaki, a’ y’u fili dingɛ kɔnɔ.’ U y’o cɛɛw fili dingɛ kɔnɔ tuma min na, jaraw y’u dumu yɔrɔnin kelen.

Dariyusi ye cii nin lase a ka jamana mɔgɔw ma ko: ‘Bɛɛ ka kan ka siran Daniyɛli ka Ala ɲɛ. A ye Daniyɛli kisi jaraw ma.’

Yala i be Jehova deli loon o loon i n’a fɔ Daniyɛli wa?