Nagbalin met nga ari ti Babilonia ni Dario a Medo. Nakita ni Dario a naidumduma ni Daniel isu a pinagbalinna a pangulo dagiti nangato nga opisial. Immapal dagitoy nga opisial ket kayatda a mapukaw ni Daniel. Ammoda nga agkarkararag ni Daniel ken Jehova iti mamitlo iti kada aldaw, isu nga imbagada ken Dario: ‘O ari, adda koma maaramid a linteg a mangibaga a sika laeng ti rumbeng a pagkararagan. Ti saan nga agtulnog ket maipisok iti abut a napunno iti leon.’ Nagustuan ni Dario ti linteg ket pinirmaanna.

Idi naammuan ni Daniel ti baro a linteg, dagus a nagawid. Nagparintumeng iti sango ti nakalukat a tawa ket nagkararag ken Jehova. Simrek iti balayna dagiti umap-apal nga opisial ket natiliwanda nga agkarkararag. Nagdardarasda a napan ken Dario ket impulongda: ‘Saan nga agtultulnog kenka ni Daniel. Mamitlo iti kada aldaw nga agkarkararag iti Diosna.’ Kaykayat ni Dario ni Daniel ket dina kayat a matay. Agmalmalem a pinampanunotna no kasanona a maisalakan ni Daniel. Ngem uray ti ari saanna a mabalin a baliwan ti linteg a pinirmaannan. Masapul a bilinenna dagiti  adipenna nga ipisokda ni Daniel iti abut dagiti narungsot a leon.

Iti dayta a rabii, saan a nakaturog ni Dario ta madandanagan unay ken Daniel. Kabigatanna, nagtartaray a napan iti abut ket impukkawna: ‘Daniel, insalakannaka kadi ti Diosmo?’

Adda boses a nangngeg ni Dario—boses ni Daniel! Imbaga ni Daniel: ‘Kinaem ti anghel ni Jehova ti ngiwat dagiti leon. Saandak nga inan-ano.’ Naragsakan unay ni Dario! Imbilinna a mayaon ni Daniel iti abut. Saan man la a nakaramutan ni Daniel. Kalpasanna, imbilin ti ari: ‘Ipisokyo dagiti nangakusar ken Daniel.’ Idi naipisokdan, kinnan ida a dagus dagiti leon.

Imbilin ni Dario kadagiti iturturayanna: ‘Masapul nga agbuteng ti amin iti Dios ni Daniel. Insalakanna ni Daniel kadagiti leon.’

Inaldaw met kadi nga agkarkararagka ken Jehova, kas ken Daniel?