Babilɔɔnɩ wiyaʋ nɔɔyʋ ɖɔɖɔ payaɣaɣ se Dariyusi. Ɛɛkɛ Mediya tʋ. Ɛɛnawa se Danɩyɛɛlɩ kaawɛ ndɩ nɛ ɛyaa lalaa, pʋyɔɔ ɛkpaɣ-ɩ se ɛkɛ e-kewiyaɣ taa ɛyaa sɔsaa ñʋʋdʋ. Sɔsaa mba, pataasɔɔlɩ Danɩyɛɛlɩ nɛ pasʋsʋʋ-ɩ, nɛ pe-liu kaawɛ se pakʋ-ɩ. Paanawa se Danɩyɛɛlɩ sɛɣ Yehowa tam nabudozo paa evemiye nɖɩ. Pʋyɔɔ powoba peheyi Dariyusi se: ‘Ðajaa wiyaʋ, pɩwɛɛ se ŋɖʋ paɣtʋ natʋyʋ se ñe-ɖeke koŋ pɩpɔzʋʋ se pɛsɛɛ. Nɛ ye nɔɔyʋ ɛtɩɖɔ paɣtʋ ndʋ tɩ-yɔɔ yɔ, pɛpɛɖɩɣ-ɩ tɔɔyɩŋ pɔʋ taa.’ Tɔm ndʋ tɩkɛdɩnɩ wiyaʋ nɛ ɛɖʋ paɣtʋ nɛ ɛñɩɣ niye paɣtʋ takayaɣ ŋga ka-taa.

Danɩyɛɛlɩ tɩɩnɩ paɣtʋ ndʋ lɛ, ɛpɩsɩ ɛ-tɛ. Ewolo nɛ eluŋ mondoɖebɔʋ cɔlɔ nɛ ɛtɩmɩɣnɩ Yehowa. Abalaa sʋsɩ tɩnaa mba pasʋʋ ɛ-yɔɔ nɛ pamaɣnɩ-ɩ eɖiɣni tɩmʋʋ. Pese nɛ powolo peheyi Dariyusi se: ‘Danɩyɛɛlɩ kizaa se ɛɛñaŋ ña-paɣtʋ. Paa evemiye nɖɩ lɛ, ɛtɩmɩɣnɩ ɛ-Ɛsɔ tam nabudozo.’ Dariyusi kaasɔɔlɩ Danɩyɛɛlɩ nɛ ɛtaasɔɔlɩ se ɛkʋ-ɩ. Pʋyɔɔ ɛlakaɣ lɩmaɣza se ɛna nʋmɔʋ ŋgʋ kɩ-yɔɔ ɛpɩzɩɣ nɛ ɛtɩŋna nɛ ɛya Danɩyɛɛlɩ ñʋʋ yɔ. Ɛlɛ, halɩ wiyaʋ maɣmaɣ taawɛɛnɩ waɖɛ se ɛlɛɣzɩ paɣtʋ ndʋ ɛtɛm tɩ-taa nesi ñɩɣʋ yɔ. Ɛɛnaɣ se ɛla ɛzɩma lɛ, eyele nɛ ɛ-ɛyaa kpaɣ Danɩyɛɛlɩ nɛ pɛpɛɖɩ-ɩ tɔɔyɩŋ pɔʋ taa.

 Ðoo ana a-taa, Dariyusi maɣzaɣ Danɩyɛɛlɩ yɔɔ siŋŋ nɛ ɛtɩpɩzɩ nɛ eɖoo. Tɛʋ fema lɛ, ese lɛɛ lɛɛ nɛ ewolo tɔɔyɩŋ pɔʋ cɔlɔ nɛ ekoo nɛ ɛyaa Danɩyɛɛlɩ se: ‘Ñɛ-Ɛsɔ pɩzaa nɛ ɛya ña-ñʋʋ na?’

Dariyusi nɩɩ nɔɔyʋ nɔɔ. Pɩɩkɛ Danɩyɛɛlɩ nɔɔ! Ecosi Dariyusi se: ‘Yehowa tiyiyu kɔma nɛ ɛɖɩɣ tɔɔyɩŋ nɔɔ. Tɔɔyɩŋ tɩlabɩ-m nabʋyʋ.’ Nɛ Dariyusi taa la leleŋ siŋŋ. Eyele nɛ palɩzɩ Danɩyɛɛlɩ tɔɔyɩŋ pɔʋ taa. Pɩtɩtɩɩkayʋʋ Danɩyɛɛlɩ ɖoli. Pʋwayɩ lɛ, wiyaʋ yɔɔdɩ se: ‘Ɩkpa abalaa mba palɩ Danɩyɛɛlɩ wayɩ yɔ nɛ ɩpɛɖɩ-wɛ tɔɔyɩŋ pɔʋ ŋgʋ kɩ-taa.’ Patɩɩpɛɖɩ abalaa mba lɛ, tɔɔyɩŋ pʋʋtɩ-wɛ.

Dariyusi ɖʋ paɣtʋ tʋnɛ ɛ-samaɣ: ‘Pɩwɛɛ se ɩse sɔɔndʋ Danɩyɛɛlɩ tɛ Ɛsɔ, mbʋ pʋyɔɔ yɔ, ɛyabɩ ɛ-ñʋʋ tɔɔyɩŋ cɩkpaŋ tɛɛ.’

Ŋtɩmɩɣnɩ Yehowa paa evemiye nɖɩ ɛzɩ Danɩyɛɛlɩ yɔ?