Mũthamaki ũngĩ wathanire Babuloni eetagwo Dario na aarĩ Mũmedia. Nĩ onaga atĩ Danieli aarĩ mũndũ wa mwanya mũno. Aamũheire wĩra wa kũrũgamĩrĩra andũ arĩa maarĩ a bata mũno bũrũri-inĩ ũcio. Andũ acio nĩ maaiguagĩra Danieli ũiru mũno na nĩ meendaga kũmũũraga. Tondũ nĩ maamenyaga atĩ Danieli nĩ aahoyaga Jehova maita matatũ o mũthenya, meerire mũthamaki ũũ: ‘Mũthamaki witũ, reke kũgĩe na watho atĩ andũ othe nĩwe marĩhoyaga. Mũndũ o wothe ũngiuna watho ũcio agĩrĩirũo gũikio irima-inĩ rĩa mĩrũthi.’ Dario nĩ aakenirio nĩ rĩciria rĩu na agĩkĩra watho ũcio kĩrore.

Rĩrĩa Danieli aaiguire watho ũcio mwerũ, aathiire gwake nyũmba, akĩhingũra ndirica, na agĩturia maru nĩguo ahoe Jehova. Andũ acio maarĩ na ũiru nĩ maathire gwake na makĩmũkora akĩhoya. Maathiire kũrĩ Dario na makĩmwĩra ũũ: ‘Danieli ndaragwathĩkĩra. Ahoyaga Ngai wake maita matatũ o mũthenya.’ Dario nĩ eendete Danieli mũno na ndangĩendire oragwo. Aatindire agĩciria ũrĩa angĩamũhonokirie. No mũthamaki angĩahĩtũkirie watho, o nake ndangĩahotire kũũcenjia. Kwoguo no mũhaka aangĩathanire Danieli aikio irima-inĩ rĩa mĩrũthi.

 Ũtukũ ũcio Dario aarĩ na kĩeha mũno nĩ ũndũ wa Danieli nginya akĩaga toro. Mũthenya ũrĩa warũmĩrĩire nĩ aarokire irima-inĩ rĩa mĩrũthi na agĩtana ũũ: ‘Danieli, Ngai waku nĩ arakũhonokirie?’

Dario nĩ aaiguire mũgambo. Mũgambo ũcio warĩ wa Danieli! Danieli oigire ũũ: ‘Mũraika wa Jehova nĩ arahingire mĩrũthi tũnua na ndĩnanjĩka ũndũ.’ Dario nĩ aakenire mũno! Nĩ aathanire Danieli arutwo irima-inĩ rĩu. Danieli ndaagurarĩtio nĩ mĩrũthi o hanini. Mũthamaki aathanire ũũ: ‘Oyai andũ arĩa marathitangĩte Danieli mũmaikie irima-inĩ rĩu rĩa mĩrũthi.’ Rĩrĩa maikirio, no gũtaamburũo maatamburangirũo nĩ mĩrũthi ĩyo.

Dario nĩ aaheire andũ ake watho na akĩmeera ũũ: ‘Andũ othe no mũhaka metigĩre Ngai wa Danieli. Nĩ arahonokirie Danieli kuuma kũrĩ mĩrũthi.’

Hihi nĩ ũhoyaga Jehova o mũthenya ta ũrĩa Danieli eekaga?