Babilon osha li sha pangelwa kohamba imwe vali yedina Darius Omumedia. Darius okwa li a didilika kutya Daniel okwe likalekelwa. Okwa li e mu nangeka po a kale ta kwatele komesho ovalumenhu va tumbala moshilongo. Ovalumenhu ovo ova li va twila Daniel ondubo nova li va hala a fye. Ova li ve shii kutya Daniel oha ilikana kuJehova lutatu efiku keshe, nomolwaasho ova li va lombwela Darius tava ti: ‘Ohamba, napa totwe omhango tai ufa kutya keshe umwe na ilikane ashike kwoove. Oo ita ka dulika komhango, na kupulwe mekololo li yadi eenghoshi.’ Darius okwa li e hole eetepo olo, ndele ta shaina omhango.

Diva eshi Daniel a uda kutya opa totwa omhango ipe, okwa ya keumbo laye. Okwa li a twa eengolo ndele ta ilikana kuJehova popepi nekende la yeuluka. Ovalumenhu ovanandubo ova li va ponokela meumbo laye ndele tave mu kwata ta ilikana. Ova li va tondokela kuDarius ndele tava ti: ‘Daniel ita dulika kwoove. Oha ilikana kuKalunga kaye lutatu efiku keshe.’ Darius okwa li e hole Daniel noka li a hala a fye. Efiku alishe okwa kala ta diladila kutya na ninge ngahelipi opo a xupife Daniel. Ashike nohamba kaya li nokuli tai dulu okulundulula omhango oyo ya shaina nale. Okwa li a lombwela ovapiya vaye va ekele Daniel mekololo mu na eenghoshi da handuka.

 Oufiku oo Darius okwa li te lipula neenghono naDaniel, nomolwaashi ka li a dula okukofa. Ongula, okwa tondokela kekololo ndele ta pula Daniel ta ti: ‘Kalunga koye okwe ku xupifa ngoo?’

Darius okwa uda ondaka yaDaniel. Daniel okwa lombwela Darius a ti: ‘Omweengeli waJehova okwa pata omakanya eenghoshi. Inadi ninga nge sha nandenande.’ Darius okwa li a hafa neenghono. Okwa li a lombwela ovanhu va kufe mo Daniel mekololo leenghoshi. Daniel kali e na okapute kasha nandenande. Opo nee ohamba oya lombwela ovanhu tai ti: ‘Ovalumenhu ovo va lundila Daniel va ekeleni mekololo leenghoshi.’ Eshi ovanhu ovo va ekelwa mekololo, eenghoshi ode va lya po meendelelo.

Darius okwa li a lombwela ovanhu ta ti: ‘Keshe umwe oku na okutila Kalunga kaDaniel. Okwe mu xupifa keenghoshi.’

Oho ilikana ngoo kuJehova efiku keshe, ngaashi Daniel?