Wan ɔda kiŋ we rul na Babilɔn na Darayɔs, we kɔmɔt na Midia. Darayɔs bin si se Daniɛl spɛshal. I mek Daniɛl de oba ɔl di impɔtant man dɛn na di land. Dɛn man dɛn de bin de jɛlɔs Daniɛl, ɛn dɛn bin want fɔ kil am. Dɛn bin no se Daniɛl de pre to Jiova tri tɛm ɛvride, so dɛn tɛl Darayɔs se: ‘Wi kiŋ, wi fɔ gɛt wan lɔ we na yu nɔmɔ ɔlman fɔ pre to. Dɛn fɔ put ɛnibɔdi we nɔ obe dis lɔ na di layɔn dɛn ol.’ Darayɔs bin lɛk wetin dɛn se, ɛn i sayn di lɔ.

As Daniɛl yɛri bɔt di nyu lɔ, i go na in os. I nil dɔŋ bifo in winda we bin opin ɛn pre to Jiova. Di man dɛn we bin de jɛlɔs am go insay in os ɛn kech am de pre. Dɛn rɔn go to Darayɔs ɛn tɛl am se: ‘Daniɛl nɔ de obe yu. I kin pre to in Gɔd tri tɛm ɛvride.’ Darayɔs bin lɛk Daniɛl, ɛn i nɔ bin want mek i day. Ol de i bin de tink bɔt aw i go ebul fɔ sev Daniɛl. Bɔt ivin di kiŋ nɔ bin ebul fɔ chenj di lɔ we i dɔn sayn. I tɛl in sojaman dɛn fɔ put Daniɛl na di ol usay wayl layɔn dɛn de.

 Da nɛt de, Darayɔs bin rili de wɔri bɔt Daniɛl ɛn dat mek i nɔ ebul fɔ slip. We do klin, i rɔn go na di ol ɛn kɔl Daniɛl se: ‘Yu Gɔd sev yu?’

Darayɔs yɛri wan vɔys. Na bin Daniɛl in vɔys! I kɔl Darayɔs ɛn tɛl am se: ‘Jiova in enjɛl lɔk di layɔn dɛn mɔt. Dɛn nɔ du natin to mi.’ Dis mek Darayɔs rili gladi! I tɛl in sojaman dɛn fɔ pul Daniɛl insay di ol. Ɛn natin nɔ du Daniɛl. Dɔn di kiŋ tɛl in sojaman dɛn se: ‘Una trowe di man dɛn we tɔk bad bɔt Daniɛl insay di layɔn dɛn ol.’ We dɛn trowe di man dɛn insay di ol, di layɔn dɛn it dɛn.

Darayɔs tɛl ɔl in pipul dɛn se: ‘Ɔlman nid fɔ fred Daniɛl in Gɔd. I sev Daniɛl frɔm di layɔn dɛn.’

Jɔs lɛk Daniɛl, yu kin pre to Jiova ɛvride?