Wana cheleŋ wa masaa le Babilɔŋ ndo wa Daliɔɔ fula Mɛdi wo ni. Mi Daliɔɔ saaluŋ maa Daaniɛɛ wa teŋgeŋ. Mbo handu Daaniɛɛ wanaa sɔviaa kpou o Babilɔŋ niŋ bolleŋ. Le hei, mi puaa haa tul Daaniɛɛ leyɛ, nduyɛ ndaa yeema pɛŋ ma dii ndu. Mɛɛ nda sina maa mi Daaniɛɛ ndoo piɛi le yaa o Chɛhowa lo o paaleŋ niŋ, ma dimul Daliɔɔ aa: ‘Fallo masaa, ŋ nɔ miŋ dɔu sawaa maa wana o wana piɛi mɛlɛka o mɛlɛka cheleŋ te mɛɛ num pilɛ kpe. Wana o wana diikuŋ sawaa hoo le, ŋ wou ndu o sooŋ kpɔkuŋnda niŋ.’ Mi Daliɔɔ naŋ kɔl a kɛɛsiaa hoo, okoŋ mbo pila suei.

Dimioo nuaa Daaniɛɛ tuei a sawa sɛnɛiyo hoo okɔɔ, mbo kua o chiɛi ndɔɔ. Mbo kɔ baŋ wulaŋ o wundɛi ndɔɔ, mbo wa piɛileŋ o Chɛhowa lo. Mi puaa tul ndu kaŋ leyɛ wa kɔ luɛi ndu choo, ma komal ndu piɛileŋ. Ma miiŋgu naa Daliɔɔ chua a kiltaŋ, ma dimul ndu aa: ‘Daaniɛɛ diikuŋ sawa numndo le. Le yaa kpulukuu o piɛi Mɛlɛka ndɔɔ o paaleŋ niŋ ni.’ Kɛ Daliɔɔ ndoo hɛnaŋ a Daaniɛɛ tau. Le hei, ndoo yeema mi Daaniɛɛ ndoo vi le. Lepaa o lepaa, o wa kindiŋndo le nyɛ o tosa le mbo chiindiaa Daaniɛɛ wo. Kɛ masaa bɛɛ ndoo nɔla lɛ sawa o pila hoo sueiyo siŋga le. Mbo dimul puaa kaŋ maa a bii Daaniɛɛ ma kɔ wou ndu o sooŋ kpɔkuŋnda niŋ.

Ichɔl koŋ pii, Daliɔɔ nɔla luaŋ te. Kanifuule, o wa buulaŋndo a Daaniɛɛ okɔɔ. Idiiyo puŋ, mbo nyaanuŋ  naa nda wou Daaniɛɛ o sooŋ kpɔkuŋnda niŋnda. Mbo kɔ nyuna ndu aa: ‘Baa mi Mɛlɛka numndo chiindiaa num pa?’

Okoŋ, mi Daliɔɔ tuɛi Daaniɛɛ suɛi mbo dimul ndu aa: ‘Chɛhowa yɔŋ maalikɛinɔɔ mbo kiindiaa kpɔkuŋnda sondo laŋ. A yɔŋ ya nyɛ o nyɛ le.’ Mi Daliɔɔ naŋ kɔl tau! Mbo dimul waŋnda ma soli Daaniɛɛ o sooŋ kpɔkuŋnda niŋ. Nyɛ o nyɛ yɔŋnuŋ ndu le. Okoŋ, mi masaa dimul waŋnda aa: ‘Puaa tosa haa ma wou Daaniɛɛ o sooŋ kpɔkuŋnda niŋnda, la nyindu nda o sooŋ koŋ niŋ.’ Mɛɛ nda nyindu puaa haa o sooŋ koŋ niŋ, mi kpɔkuŋnda sɛɛsiaa nda kpou.

Mi Daliɔɔ duau sawaa, mbo dimul wanaa nduaa kpou aa: ‘Wana o wana nɔ mbo nɔ siooŋnde le Mɛlɛka Daaniɛɛ piɛiyo. Ndu chiindiaa ndu kpɔkuŋnda o sondo ni.’

Baa ma piɛi pa o Chɛhowa lo lepaa o lepaa maa Daaniɛɛ?