တၢ်မၤလိ ၆၄
တၢ်တ့ၢ်လီၤဝံဒၤနံးယ့လးလၢ ခ့ယုၢ်ကပိၤပူၤ
ဘၤဘူၤလိၣ်အစီၤပၤလၢအဂၤတဂၤန့ၣ် မ့ၢ်ဝဲပှၤမၤဒဲဖိစီၤဒၤရယါဝ့ၣ်လီၤ. စီၤပၤဒၤရယါဝ့ၣ် ထံၣ်ဝဲလၢ ဝံဒၤနံးယ့လးန့ၣ် လီၤဆီန့ၢ်ဒံးပှၤဂၤတဖၣ်လီၤ. လၢတၢ်န့ၣ်အဃိ စီၤပၤပာ်ထီၣ်ဝံဒၤနံးယ့လး လၢအပဒိၣ်ဖးဒိၣ်တဖၣ်အဖီခိၣ်န့ၣ်လီၤ. ပိာ်ခွါတဖၣ်အံၤ သးက့ၣ်ဝဲဝံဒၤနံးယ့လးဒီး အဲၣ်ဒိးမၤသံကွံာ်အီၤလီၤ. အဝဲသ့ၣ်သ့ၣ်ညါဝဲလၢ ဝံဒၤနံးယ့လး ဃ့ဘါထုကဖၣ်တၢ်လၢ ယဟိဝၤယွၤ အအိၣ်တနံၤသၢဘျီလီၤ. အဃိ အဝဲသ့ၣ်တဲဘၣ် စီၤပၤဒၤရယါဝ့ၣ်လၢ– ‘အိ, စီၤပၤဧၢ ပကြၢးထုးထီၣ်တၢ်သိၣ်တၢ်သီတခါ လၢပှၤကိးဂၤဒဲးန့ၣ် ကဘၣ်ဃ့ဘါထုကဖၣ်တၢ် ထဲလၢနအိၣ်လီၤ. ဒီးပှၤတဂၤဂၤမ့ၢ်တဒိကနၣ်ဝဲ တၢ်သိၣ်တၢ်သီတခါအံၤန့ၣ် ကဘၣ်တၢ်တ့ၢ်လီၤအီၤဆူ ခ့ယုၢ်ကပိၤပူၤလီၤ.’ စီၤပၤဒၤရယါဝ့ၣ် ဘၣ်သူၣ်ဘၣ်သးဝဲ တၢ်ဟ့ၣ်ကူၣ်တခါအံၤ ဒီးထုးထီၣ်ဝဲတၢ်သိၣ်တၢ်သီအံၤလီၤ.
ဖဲဝံဒၤနံးယ့လး နၢ်ဟူဘၣ်ဝဲတၢ်သိၣ်တၢ်သီလၢ အသီတခါအံၤအခါ အဝဲက့ၤဝဲဆူအဟံၣ်လီၤ. ဝံဒၤနံးယ့လး ချံးလီၤအခီၣ်ဒီးဃ့ဘါထုကဖၣ်တၢ်လၢ ယဟိဝၤယွၤအအိၣ် လၢပဲတရီဖိအမဲာ်ညါလီၤ. ဖဲန့ၣ်အခါ ပှၤလၢအသးက့ၣ် ဝံဒၤနံးယ့လးတဖၣ် ဟဲနုာ်လီၤလၢအဟံၣ် ဒီးထံၣ်ဝဲဝံဒၤနံးယ့လး ဃ့ဘါထုကဖၣ်တၢ် လၢအဟံၣ်ပူၤလီၤ. ဝံၤဒီးအဝဲသ့ၣ်လဲၤဃ့ၢ်ဝဲဆူ စီၤပၤဒၤရယါဝ့ၣ်အအိၣ် ဒီးတဲဘၣ်အီၤလၢ– ‘ဝံဒၤနံးယ့လး တဒိကနၣ်နကလုၢ်ဘၣ်. အဝဲဃ့ဘါထုကဖၣ်တၢ်လၢ အကစၢ်ယွၤအအိၣ် တနံၤသၢဘျီလီၤ.’ စီၤပၤဒၤရယါဝ့ၣ် ဘၣ်သူၣ်ဘၣ်သးဝဲ ဝံဒၤနံးယ့လးအဃိ တအဲၣ်ဒိးလၢအဝဲကသံဝဲဘၣ်. ဒီတနံၤကျၢၤန့ၣ် စီၤပၤဒၤရယါဝ့ၣ် ဂုာ်ကျဲးစၢးဃုကျဲလၢ ကမၤစၢၤဝဲဝံဒၤနံးယ့လးအဂီၢ်လီၤ. ဘၣ်ဆၣ် မ့ၢ်လၢစီၤပၤဒၤရယါဝ့ၣ် ထုးထီၣ်ဝဲတၢ်သိၣ်တၢ်သီဝံၤလံအဃိ အဝဲဆီတလဲက့ၤဝဲတသ့လၢၤဘၣ်. လၢတၢ်န့ၣ်အဃိ အဝဲမၢဝဲအခ့အပှၤလဲၤတၢၤလီၤ ဝံဒၤနံးယ့လး လၢခ့ယုၢ်ကပိၤပူၤလီၤ.
ဖဲနၤအဝဲန့ၣ် စီၤပၤဒၤရယါဝ့ၣ် ဘၣ်ယိၣ်တၢ်လၢ ဝံဒၤနံးယ့လးအဂီၢ်အဃိ အဝဲမံဝဲတန့ၢ်ဘၣ်. ဖဲမုၢ်ဝါထီၣ်န့ၣ် စီၤပၤလဲၤဃ့ၢ်ဝဲဆူခ့ယုၢ်ကပိၤအခိၣ်ထိး ဒီးသံကွၢ်ဝံဒၤနံးယ့လးလၢ– ‘မ့ၢ်နကစၢ်ယွၤ မၤပူၤဖျဲးနၤစ့ၢ်ကီးဧါ.’
ဖဲန့ၣ်န့ၣ် စီၤပၤဒၤရယါဝ့ၣ် နၢ်ဟူဝဲတၢ်ကလုၢ်သီၣ်ဒီး သ့ၣ်ညါဝဲလၢအမ့ၢ် ဝံဒၤနံးယ့လးအကလုၢ်လီၤ. ဝံဒၤနံးယ့လး တဲဘၣ်စီၤပၤလၢ– ‘ယဟိဝၤယွၤ မၢလီၤဝဲမူခိၣ်ကလူး ဟဲကျၢၢ်တံၢ်ဃာ်ဝဲ ခ့ယုၢ်တဖၣ်အကိာ်ပူၤလီၤ. အဃိ ခ့ယုၢ်တဖၣ်အံၤတအ့ၣ်ယၤနီတစဲးဘၣ်.’ ဖဲစီၤပၤဒၤရယါဝ့ၣ် နၢ်ဟူဘၣ်ဝဲအခါ အဝဲသးခုဝဲဒိၣ်မးလီၤ. ဒီးစီၤပၤမၢပှၤထုးထီၣ်ကွံာ် ဝံဒၤနံးယ့လးလၢ ခ့ယုၢ်ကပိၤပူၤလီၤ. ဖဲဝံဒၤနံးယ့လးဟဲက့ၤထီၣ်ဝဲအခါ အဝဲတဘၣ်ဒိဘၣ်ထံးဝဲနီတစဲးဘၣ်. ဝံၤဒီးစီၤပၤတဲဝဲလၢ– ‘တ့ၢ်လီၤကွံာ်ပှၤလၢအသးက့ၣ် ဝံဒၤနံးယ့လးလၢ ခ့ယုၢ်ကပိၤပူၤတက့ၢ်.’ ဖဲပှၤတ့ၢ်လီၤကွံာ်အဝဲသ့ၣ်အခါ ခ့ယုၢ်အီၣ်ကွံာ်အဝဲသ့ၣ်ခဲလၢာ်လီၤ.
ဖဲတၢ်မၤအသးအံၤ ဝံၤအလီၢ်ခံ စီၤပၤဒၤရယါဝ့ၣ် ထုးထီၣ်ဝဲတၢ်ကလုၢ်လၢ– ‘ထံဖိကီၢ်ဖိ ခဲလၢာ်ကဘၣ်ပျံၤဝဲ ဝံဒၤနံးယ့လး အကစၢ်ယွၤ မ့ၢ်လၢအဝဲမၤပူၤဖျဲး ဝံဒၤနံးယ့လး လၢခ့ယုၢ်ကပိၤပူၤအဃိလီၤ.’
ဒ်ဝံဒၤနံးယ့လးအသိး မ့ၢ်နဃ့ဘါထုကဖၣ်တၢ်ဆူ ယဟိဝၤယွၤအအိၣ် ကိးနံၤဒဲးစ့ၢ်ကီးဧါ.
“မ့ၢ်မးယွၤသ့ၣ်ညါထုးထီၣ်ကွံာ် ပှၤယူးယီၣ်ယွၤလၢ တၢ်လ့ပစီအပူၤ” လီၤ.—၂ ပ့းတရူး ၂:၉