O Dareyuse wa mwisi Madai i ntinu wankaka wayala muna Babele. Dareyuse watoma zolanga Daniele. Wakitula Daniele se mfumu a akuluntu awonso muna nsi. O wantu awaya bamwenanga Daniele kimpala. Bavavanga e lau dia kumvonda. Bazaya wo vo Daniele wasambanga kwa Yave nkumbu tatu muna lumbu. Muna kuma kiaki, bavovesa Dareyuse vo: ‘E ntinu, sia nsiku vo wantu awonso kwa ngeye kaka bafwete samba. Konso ndiona ke lemvokela nsiku wau ko, kafwete tubwa muna wulu dia nkosi.’ Dareyuse wayangalela e ngindu zazi yo sia nsiku.

Vava Daniele kawá nsiku wau, wayenda kuna nzo andi. Vana ndambu a zianela yaziuka, wafukama yo samba kwa Yave. Vava akuluntu balwaka kuna nzo andi, bawana Daniele mu samba kena. Bayenda nzaki kwa Dareyuse yo kumvovesa vo: ‘Daniele kazolele kulemvokela ko. Wakinu samba kwa Nzambi andi nkumbu tatu muna lumbu.’ Wau vo Dareyuse watoma yangalelanga Daniele, kazola ko vo kavondwa. Muna lumbu kiakina kiawonso, wavava una kalenda vuluzila Daniele. Kansi, kana nkutu o ntinu kalendi diaka soba nsiku ko una kasikidisi kala.  Muna kuma kiaki, wavovesa makesa mandi vo batuba Daniele muna wulu dia nkosi.

Muna fuku wauna, Dareyuse kaleka tulu ko kadi watokananga kwayingi mu kuma kia Daniele. Muna mene, wayenda nzaki kuna wulu dia nkosi yo bokela Daniele vo: ‘Nga Nzambi aku uvulwizi?’

Dareyusu wawá ndinga yatuka muna wulu. Daniele una moyo! Wavova kwa Dareyuse vo: ‘Mbasi a Yave ozikidi nua mia nkosi. Ke zimpangidi diambu ko.’ Dareyuse wayangalala kikilu. Wakanikina vo batombola Daniele muna wulu. Daniele kakala ye konso ndwadi ko. O ntinu wavova vo: ‘Nutuba awana bafunda Daniele muna wulu dia nkosi.’ Vava wantu awaya batubwa muna wulu, e nkosi zabakosomona vana vau.

Dareyuse wakanikina nkangu vo: ‘Wantu awonso bafwete vumina Nzambi a Daniele, kadi ovulwizi Daniele muna nua mia nkosi.’

Nga osambanga kwa Yave lumbu yawonso nze Daniele?