Baˍbuˍlonˍ mvuhˇ miˬ hkʼaw jawˇ mawˇ teˇ gʼaˇ kʼawꞈ cawˬ la ve lehˬ Meˍdiˆ chaw Daˍriˆ meh ve yoˬ. Daˍyeˍlaˆ shu aꞈ kehˉ cuˇ yiˍ cawˬ leh kanˉ te puiˉ ve htaꞈ Daˍriˆ gʼa mawˬ ve pa taw a maꞈ lonˉ teˇ hpaˍ awˬ hkʼoˆ awˬ hoˉ te leh mvuhˇ miˬ htaꞈ uˉ peunˍ tcuh ve yoˬ. Yaꞈ hkʼaˇ, Daˍyeˍlaˆ htaꞈ chaw laiˉ gʼaˇ hkawehˉ leh yawˇ htaꞈ tiˇ pehˍ gaˇ ve yoˬ. Teˇ nyi 3 pawˆ Daˍyeˍlaˆ Yaˬhoˉvaˬ geh bon lawˬ ve htaꞈ chaw chi teˇ hpaˍ gʼa mawˬ ve yoˬ. Yawˇ hui Daˍriˆ htaꞈ hto piˇ ve, ‘jawˇ mawˇ Daˍriˆ˗oˬ mvuhˇ miˬ yaˇ teˇ gʼaˇ le le nawˬ htaꞈ cehˬ tiˉ oˉ kʼoˍ pui tuˬ awˬ liˇ tawˇ hkawˇ teh piˇ˗oˆ. A shu teˇ gʼaˇ maˇ gʼaꞈ te ve kʼo, laˇ caˬ shiˉ hkawˆ hkʼaw baˬ keu piˇ tuˬ yoˬ.’ Dawˇ hkʼaˇ chi ve htaꞈ Daˍliˆ dawˇ cawˇ leh awˬ liˇ tawˇ hkawˇ oˇ ve htaꞈ yawˇ ve awˬ meh yinˉ tcuhˉ taˍ ve yoˬ.

Daˍyeˍlaˆ awˬ liˇ tawˇ hkawˇ awˬ suhˉ teh taˍ ve htaꞈ gʼa kaˇ ve teˇ yanˇ, yawˇ aˉ hkʼaw kʼoꞈ˗e ve yoˬ. Yehˬ miˉ ehˉ hpaw taˍ ve gʼuˇ suhˍ lo yawˇ hkui tcuhˉ teh leh Yaˬhoˉvaˬ geh bon lawˬ ve yoˬ. Yawˇ htaꞈ hkawehˉ ve chaw loꞈ la leh Daˍyeˍlaˆ bon lawˬ chehˇ ve htaꞈ gʼa mawˬ ve yoˬ. Yawˇ hui haˆ tawˆ kʼai leh Daˍriˆ htaꞈ hto piˇ ve, ‘Daˍyeˍlaˆ nawˬ tawˇ piˇ ve htaꞈ maˇ gʼaꞈ te. Yawˇ ve Gʼuiˬ sha geh lo teˇ nyi 3 pawˆ bon lawˬ chehˇ sheˬ.’ Yaꞈ hkʼaˇ, jawˇ mawˇ Daˍriˆ Daˍyeˍlaˆ htaꞈ nyi ma cawˇ leh yawˇ htaꞈ maˇ suh tcuh gaˇ. Mvuhˇ nyi loꞈ˗e htaˇ hkʼa gaˬ Daˍyeˍlaˆ htaꞈ hkʼaˬ hkʼe te ponˬ piˇ gʼa tuˬ dawˇ nyi chehˇ ve yoˬ. Yaꞈ hkʼaˇ, awˬ liˇ teh taˍ ve jawˇ mawˇ ve awˬ meh yinˉ tcuhˉ taˍ ve htaꞈ  yawˇ htawˇ pa maˇ gʼa. Yawˇ lehˬ Daˍyeˍlaˆ htaꞈ haiˬ jaˇ ve laˇ caˬ shiˉ hkawˆ hkʼaw baˬ keu piˇ tuˬ tawˇ piˇ ve yoˬ.

Oˇ ve teˇ haˉ Daˍriˆ Daˍyeˍlaˆ htaꞈ dawˇ hkiˉ leh zuhꞈ muiˉ maˇ kʼa. Mvuhˇ htiˇ la leh jawˇ mawˇ laˇ caˬ shiˉ hkawˆ hkʼaw gʼuiˇ kʼai leh na piˇ ve, ‘Daˍyeˍlaˆ˗oˬ nawˬ ve Gʼuiˬ sha nawˬ htaꞈ ponˬ laˇ gʼa˗aw laˇ?’

Daˍyeˍlaˆ hkʼawꞈ piˇ ve htaꞈ Daˍriˆ gʼa kaˇ ve teˇ yanˇ, ‘Yaˬhoˉvaˬ mvuhˇ naw ma tcuh yaˇ htaꞈ peu laˇ leh laˇ caˬ shiˉ ve mawꞈ kʼaw htaꞈ hoˆ piˇ taˍ ve yo. Hkʼe te leh, laˇ caˬ shiˉ teˇ hpaˍ ngaˬ htaꞈ teꞈ chiˉ maˇ te laˇ.’ Daˍriˆ ha lehˬ jaˇ leh Daˍyeˍlaˆ htaꞈ laˇ caˬ shiˉ hkawˆ hkʼaw gʼawˬ tawˆ tuˬ tawˇ piˇ ve yoˬ. Daˍyeˍlaˆ teˇ kaˬ kaꞈ maˇ naˬ. Hkʼe te leh jawˇ mawˇ tawˇ piˇ ve, Daˍyeˍlaˆ htaꞈ suh˗eˬ tcuh piˇ gaˇ ve chaw teˇ hpaˍ htaꞈ laˇ caˬ shiˉ hkawˆ hkʼaw baˬ keu piˇ˗oˆ. Yawˇ hui htaꞈ laˇ caˬ shiˉ hkawˆ hkʼaw baˬ keu piˇ ve teˇ yanˇ laˇ caˬ shiˉ hpoˆ cheꞈ caˇ ve yoˬ.

Daˍriˆ mvuhˇ miˬ yaˇ htaꞈ tawˇ piˇ ve, ‘teˇ gʼaˇ le le Daˍyeˍlaˆ ve Gʼuiˬ sha htaꞈ yawˆ yan˗oˆ. Awˬ lawn kʼo, Daˍyeˍlaˆ htaꞈ laˇ caˬ shiˉ hkawˆ hkʼaw htaiˍ hkʼawꞈ piˇ ve yoˬ.’

Nawˬ Daˍyeˍlaˆ hkʼa shuˍ teˇ nyi le le Yaˬhoˉvaˬ geh bon lawˬ chehˇ˗aw laˇ?