Mulena yomuñwi yanaabusize Babilona neli Dariusi wa Mumede. Dariusi alemuha kuli Daniele neli wa butokwa hahulu. Afa Daniele buikalabelo bwa kuzamaisa baana babakutekeha hahulu mwa naha. Baana bao neba utwelanga muna Daniele mi nebabata kumubulaya. Nebaziba kuli Daniele naalapelanga ku Jehova halaalu ka zazi ni zazi, kacwalo babulelela Dariusi kuli: ‘Wena mulena, kuswanela kutomiwa mulao kuli batu kaufela balapele feela wena unosi. Mutu kaufela yasike alatelela mulao uswanela kunepelwa mwa musima mokutezi litau.’ Dariusi atabela akalezo yeo, mi asaina mulao.

Daniele asaziba feela ka za mulao omunca wo, aya kwa ndu yahae. Fapilaa lihaulo lelikwauluzwi, akubama ka mañwele mi alapela ku Jehova. Baana bane bamuutwela muna bakena mwa ndu yahae ka sipundumukela mi bamufumana inze alapela. Bamatela ku Dariusi mi bali ku yena: ‘Daniele hasika mamela mulao wahao. Ulapelanga ku Mulimu wahae halaalu ka zazi ni zazi.’ Dariusi naalata Daniele mi naasalati kuli ashwe. Lizazi kaufela anahana mwakalamulela Daniele. Kono mulena naasakoni kucinca mulao wanaasainile kale. Kacwalo, alaela baana bahae kuli banepele Daniele mwa musima mone kunani litau zebuhali.

 Ka bona busihu bo, Dariusi naaikalezwi hahulu Daniele kuli mane naasika lobala. Habusa kakusasana, amatela kwa musima mi ahuweleza ku Daniele kuli: ‘Kana Mulimu wahao ukusilelelize?’

Dariusi autwa linzwi. Neli Daniele! Ahuweleza ku Dariusi kuli: ‘Lingeloi la Jehova likwalile milomo ya litau. Halisika niholofaza.’ Dariusi ataba hahulu! Alaela kuli Daniele azwisiwe mwa musima. Daniele naasika holofala nihaiba hanyinyani. Cwale mulena alaela kuli: ‘Hamunepele baana mwa musima bane batameleza Daniele.’ Baana bao hane banepezwi mwa musima, litau zabaca.

Dariusi aluma taelo kwa batu bahae yeli: ‘Mutu kaufela uswanela kusaba Mulimu wa Daniele. Ulamulezi Daniele kwa litau.’

Kana mwalapelanga ku Jehova zazi ni zazi, sina Daniele?