Na muze uwali umwene wa ku Babiloni a Dalyusi umwina Mede. Dalyusi waweni ukuti Danieli wali umuiyele. Acino wisile Danieli ukuya umukalamba pa onsi yonsi acindame umu Babiloni. Aonsi yaa yuvwilanga Danieli uzuwa nupya yalondanga ukumukoma. Yaamanyile ukuti cila wanda Danieli wapepanga kuli Yeova imiku itatu, fwandi yaneenyile Dalyusi iyati: ‘Mwene, kulinzile ukuya isunde ilyakuti muntu wensi aapepa sile kuli wewe. Aliwensi uwakana ukuvwila isunde lii alinzile ukusumbilwa umu ciwina cakwe ya cisama.’ Dalyusi watemilwe vino yalanzile nupya walenzile ukuti isunde lilyo lilembwe.

Lino Danieli uvwile sile ukuti isunde ilipangwa, waile umu ng’anda umwakwe. Wafukime umupiipi ni windo iliyule, atandika nu kupepa kuli Yeova. Aonsi yaya auzuwa iingile umu ng’anda umwakwe iyamuzana akupepa. Yaile kuli Dalyusi nu kumuneena iyati: ‘Danieli atakana ukukuvwila. Cila wanda akapepa kuli Leza wakwe miku itatu.’ Dalyusi watemilwe Danieli nupya atalondanga ukuti akomwe. Wanda onsi welenganyanga pali vino wali nu kucita pakuti apususye Danieli. Nomba kutaali uwali nu kusenula isunde ilyati lilembwa ukwikako sile nu mwene.  Fwandi wali nu kuneena aonsi kuti yaleme Danieli nu kumusumbila umu ciwina cakwe ya cisama akalipisye.

Wanda uwa usiku Dalyusi wasakamile sana pali Danieli icakuti atakaswile. Fwandi, katondotondo Dalyusi wasimwilile ukuciwina, nu kupundilila Danieli ati: ‘Uzye Leza wako watakupususya?’

Dalyusi uvwile izwi lyakwe Danieli ala likuti: ‘Yeova wali watuma malaika wakwe nupya ali wayala utunwa twakwe ya cisama. Yatancisile.’ Dalyusi watemilwe sana. Fwandi waneenyile aakuti yafumye Danieli umu ciwina. Danieli wafumile ala atacisike pali ponsi. Lyene umwene walanzile ati: ‘Sumbilini aonsi umu ciwina ali yabepezya Danieli.’ Lino aonsi yaya yayasumbile umu ciwina, ya cisama yayalile.

Dalyusi waneenyile antu yakwe ati: ‘Muntu wensi alinzile ukutiina Leza wakwe Danieli pano watamupususya kuli ya cisama.’

Uzye ukapepa kuli Yeova cila wanda, wakwe vino Danieli wacitanga?