Muangana mukuavo ua Mbambilone ua puile Ndaliyu mukua Mende. Ndaliyu, ua muene ngecize Ndaniele ua puile muntu ua ku lifuila cikuma. Ngeci ua mu puisile muntu ua seho ya kama mu cifuti. Vunoni kua kele vamo vamala va mu vuilile cipululu, kaha ka va tondele ku kala neni. Va tantekeyele ngecize Ndaniele ua puile na ku vundila kuli Yehova lutatu nkala litangua, ngeci va lekele Ndaliyu nguavo: ‘Muangana, tumbika lisiko linga vantu vose va vundile kuli yove. Uose a ka muesa lisino na pandele ku mu mbila mu cina ca vandumba.’ Ndaliyu ua lemene vutumbe vuaco ngeci ua hakele citantekeyeso ha lisiko liaco.

Omo Ndaniele ua vuile lisiko lia liha, ua ile ku ndzivo yeni. Ua tsikamene na ku vundila kuli Yehova mu ndzivo yeni oku na talekesa ku njanena ya casi. Vaze vamala vakua cipululu va ile mu ndzivo yeni, kaha va mu uanene a vundila. Ngeci va tuntilile kuli Ndaliyu na ku mu leka nguavo: ‘Ndaniele kesi na ku ku ononoka. Ue ku vundila kuli Njambi yeni lutatu mu litangua.’ Vunoni Ndaliyu ua lemene Ndaniele, kaha ka tondele a tse. Nkala litangua ua kele na ku singanieka vati a hasa ku ohiela Ndaniele. Muomu ambe muangana ka kele na mpoko ya ku alulula lisiko nga na lihaka laza cintantekeyeso ceni. Kaha naua na pandele ku tuma vangamba veni ku mbila Ndaniele mu cina ca vandumba.

Ku vutsiki vuze vene Ndaliyu ua lisosomuene cikuma na Ndaniele ngeci ka hasele ku kosa. Lia  mukuavo ku cimene, ua tuntilile ku cina , kaha ua sanene Ndaniele ngueni: ‘Njambi yove na ku ovola ni?’

Kaha Ndaliyu ua vuile lizi. Lizi lia Ndaniele! Ngeci Ndaniele ua tambakanene kuli Ndaliyu ngueni: ‘Kangelo ua Yehova na fuika tunua tua vanduma. Ka va nji vulumuine.’ Ndaliyu ua vuile ndzolela ya kama! Ngeci ua tumine va tundise Ndaniele mu cina ca vandumba. Ndaniele ka vulumukile ambe ka ci ntonio ka kandende kahi. Ngeci mukemuo, muangana ua tumine vangamba veni ngueni: ‘Mbilenu vamala va vangeyele Ndaniele mu cina.’ Omo va mbililemo vamala vaco, vandumba va lipapuililevo.

Mu nima yaco Ndaliyu ua lekele vantu veni ngueni: ‘Vantu vose va na pande ku vuila vuoma Njambi ya Ndaniele, muomu novola Ndaniele ku vandumba.’

Nove ue ku vundila kuli Yehova nkala litangua, ngeci mua Ndaniele ni?