Teipa, ipan Babilonia tlanauatik Darío katli euayaya Media. Darío kiitak Daniel tlauel tlalnamikiyaya, yeka kitlalik ma kinyakana tlayakananij. Nopa tlayakananij kikokoliyayaj Daniel uan kinekiyayaj kimiktisej. Kimatiyayaj Daniel expa ipan se tonal momaijtouayaya. Yeka kiiljuijkej tlanauatijketl Darío: “Totlanauatijka, xijchiua se tlanauatili kampa tikijtos san ipan ta kinamiki ma timomaijtokaj. Tlaj se akajya amo kineltokas nopa tlanauatili, ma kikalakikaj kampa itstokej leones”. Darío kipaktik tlen kiiljuijkej uan kiijtok ma kichiuakaj nopa tlanauatili.

Kema Daniel kimatki kichijtoyaj nopa tlanauatili, yajki ichaj. Nopaya, motlankuaketski iixmelak se ventana tlen tlapojtoya uan momaijtok. Nopa tlakamej katli kikokoliyayaj kalaktiuetskej ichaj uan kipantitoj momaijtouayaya. Uajka nimantsi yajkej kampa Darío uan kiiljuijkej: “Daniel amo kineltokatok motlanauatil. Expa ipan se tonal momaijtoua uan kinojnotsa iTeotsij”. Darío kuali mouikayaya iuaya Daniel uan amo kinekiyaya ma kimiktikaj. Maske se tonal moiljuik kenijkatsa kipaleuis, amo aka ueliyaya kipatla nopa tlanauatili. Yeka tlanauatik ma kikalakikaj Daniel kampa itstoyaj leones.

 Nopa youali, Darío amo uelki kochi pampa tlauel motekipachojtoya. Ualmostla ijnalok, yajki kampa itstoyaj nopa leones uan chikauak kiijtok: “¡Daniel! ¿Mitsmanauik moTeotsij?”.

Darío kikajki se akajya kinankilik. Eliyaya Daniel, kiiljuik: “Jehová iiluikaejka kinkamatsajki ne leones, yeka amo tleno nechchiuilijkej”. Darío tlauel yolpajki uan tlanauatik ma kikixtikaj. Nopa leones amo tleno kichiuilijkej Daniel. Teipa, nopa tlanauatijketl kiijtok: “¡Xikinkalakikaj kampa itstokej leones nopa tlakamej katli kikokoliaj Daniel!”. Kema kinkalakijkej nopa tlakamej, nopa leones nimantsi kinkuajkej.

Darío tlanauatik: “Moneki nochi xijtlepanitakaj iTeotsij Daniel. Ya kimanauik kema kikalakijkej kampa itstokej leones”.

Uan ta, ¿nojkia mojmostla timomaijtoua kej kichiuayaya Daniel?