Darío tlen okatka medo noijki otlanauati Babilonia. Ye okitak Daniel amo okatka ken oksekimej, ik non, okitlali ma kinyekana tlakamej tlen okachi oueyititokaj itech ueyi altepetl. Ninmej tlakamej okikokoliayaj Daniel uan okinekiayaj kimiktiskej. Yejuan okimatiayaj Daniel eyi uelta itech se tonal okitlatlaujtiaya Jehová, ik non, okiluitoj Darío: “Oh ueyi tekiua, moneki yetos se tlanauatil para nochtin san te ma mitstlatlaujtikan. Tla ikaj amo kitlakamati non tlanauatil, ma kitlamotlakan kanin katej leones”. Darío okipakti tlen okiluijkej uan okitlali non tlanauatil.

Daniel oyajki ikalijtik ijkuak okimatki okitlalijkej non yankuik tlanauatil. Ompa omotlankuaketski uan okitlatlaujti Jehová ixpan se ventana tlen otlapotoka. Tlakamej tlen okikokoliayaj Daniel okalakitoj ikalijtik uan okitakej omotlatlaujtijtoka. San niman okiluitoj Darío: “Daniel amo mitstlakamati. Eyi uelta itech se tonal kitlatlaujtia iDios”. Darío okitlakaitaya Daniel uan amo okinekiaya ma kimiktikan. Nochi tonal omokuayejyeko ken kimakixtiskia, pero nion ye uelis kipatlaskia se tlanauatil tlen yokatka. Ik non, otlanauati ma kitlamotlakan Daniel kanin okatkaj leones.

 Non yoak, Darío amo ueli okochki porque okilnamiktoka Daniel. Ijkuak otlaneski, san niman oyajki kanin okatkaj leones, otlachixki uan chikauak okijto: “¡Daniel! ¿Omitsmakixti moDios?”.

Daniel okinankili Darío: “Iángel Jehová okinkamatsakuak leones uan amo itlaj onechchiuilijkej”. Darío oyolpakik uan otlanauati ma kikixtikan. Amo itlaj okipanok Daniel. Satepan, ueyi tekiua otlanauati: “¡Xikintlamotlakan kanin katej leones tlakamej tlen okiteluijkej Daniel!”. Ijkuak okintlamotlakej, leones san niman okinkuajkej.

Darío okinnauati akinmej ochantiayaj ialtepe: “Nochtin moneki kitlakaitaskej iDios Daniel. Ye okimakixti, ik non, leones amo okikuajkej Daniel”.

¿Te noijki mojmostla tiktlatlaujtia Jehová ijkon ken okichiuaya Daniel?