Darius Omumedia okwa li gumwe gwomaakwaniilwa yaBabilonia. Darius okwa li a mono kutya Daniel omuntu i ikalekelwa. Omukwaniilwa okwe mu ningi elenga ekuluntu lyayakwawo moshilongo ashihe. Omalenga galwe oga li ga sila Daniel efupa, noga li ga hala a katukilwe onkatu. Omalenga oga li ge shi shi kutya Daniel oha galikana lutatu esiku kehe. Oga lombwele omukwaniilwa Darius ga ti: ‘Gandja oshipango aantu ayehe ya kale taya galikana kungoye awike. Shaa ngoka itaa vulika koshipango shoye nu umbilwe mekololo lyoonime.’ Omukwaniilwa okwa li a hokwa edhiladhilo ndyoka, e ta shaina oshipango.

Konima owala sho Daniel u uvu oshipango shoka oshipe, okwa yi kegumbo lye. Okwa tsu oongolo popepi nekende lyondunda lye eguluka e ta galikana kuJehova. Omalenga ngoka ga tsila Daniel ondumbo oge ya megumbo lye, e tage mu adha ta galikana. Oga tondokele komukwaniilwa Darius e taga ti: ‘Daniel ine ku simaneka. Oha galikana Kalunga ke lutatu esiku kehe.’ Omukwaniilwa okwa li e hole Daniel noka li a hala a sa. Okwa kala ta ningi oonkambadhala a hupithe Daniel esiku alihe. Mbela shono osha li ngaa tashi vulu okulundulula ompango ndjono a shaina nale? Aawe. Onkee ano, okwa gandja elombwelo Daniel a kwatwe noku umbilwe mekololo lyu udha oonime dhi mu lye po.

 Uusiku mboka omukwaniilwa ina kotha okwa kala owala ti ipula naDaniel. Ongulonene okwa meneka ta tondoka u uka kekololo lyoonime. Okwa pula Daniel a ti: ‘Kalunga koye okwa vula tuu oku ku hupitha?’

Omukwaniilwa oku uvu ewi. Ewi ndyoka olyaDaniel. Daniel okwi igidha a ti: ‘Jehova okwa tumu omuyengeli gwe a mutike omakana goonime, opo dhaa lye ndje po.’ Omukwaniilwa sho e shi uvu okwa li a nyanyukwa noonkondo. Okwa gandja elombwelo Daniel a hilwe mo mekololo lyoonime. Sho a zi mo, ka li e na mpoka a yagwa koonime. Okuza mpono omukwaniilwa okwa gandja elombwelo a ti: ‘Umbileni aalumentu mboka ya lundile Daniel mekololo lyoonime.’ Sho aalumentu mboka yu umbilwa mekololo, oonime odhe ya li po.

Omukwaniilwa okwa nyolele aantu ayehe etumwalaka tali ti: ‘Kehe gumwe na simaneke Kalunga kaDaniel. Okwa hupitha omupiya gwe Daniel mekololo lyoonime.’

Mbela oho galikana ngaa kuJehova esiku kehe ngaashi Daniel?