Ba gafuriata, tobali razo ba Mbabilona Dario niha Media. Ba wamaigi Dario faböʼö sibai Danieli moroi ba zohalöwö sebua faka tanö böʼö. Börö daʼö, ifataro Danieli tobali samaigi-maigi niha sohalöwö ba soi daʼö. Afökhö dödöra khö Danieli ba edöna labunu ia. Laʼila wa omasi sibai Danieli mangandrö ia khö Yehowa tölu kali maʼökhö. Börö daʼö, lamane khö Dario, ’He Tuagu Razo, sökhi na öbeʼe gamakhoita enaʼö ha khöu mangandrö fefu niha. Haniha zi lö moloʼö, ba latiboʼö ia ba dögi zingo.’ Fao dödö Dario ba iteka zura gamakhoita si bohou andrö.

Me no irongo gamakhoita daʼö Danieli, mangawuli ia ba nomonia. Aefa daʼö, mangandrö ia khö Yehowa tanö föna zandrela si no teboka. Ba zi lö mudöna-döna, tohare niha sagafökhö tödö möi ira bakha ba laʼila ia me ilau mangandrö. Iʼanemaiʼö lafalukhaisi Dario ba lamane, ’Lö iʼoʼö niwaʼöu Danieli Tua. Mangandrö ia khö Lowalanginia tölu kali maʼökhö.’ Lö omasi Dario na mate Danieli, börö me omasiʼönia. Maʼö-maʼökhö iʼalui lala ba wanolo Danieli. Hizaʼi, lö hadöi si tola mamawuʼa amakhoita daʼö hewaʼae na razo ia. Hewaʼae na abua gölö Dario, ba hasambalö iwaʼö khö ndra sozago enaʼö latiboʼö Danieli ba dögi zingo sagamuʼi.

 Bongi daʼö, lö iʼila mörö Dario börö woʼangeragö Danieli. Sihulö wonginia, idölö ia ba dögi zingo ba muʼao ia, ’He Danieli, hadia itolo ndraʼugö Lowalangiu?’

Lö ara, irongo li si hede Dario. Li Danieli daʼö! Imane Danieli, ’No iduhö mbawa zingo daʼa malaʼika Yehowa. Lö niʼusura yaʼo.’ Omuso sibai dödö Dario! Ifaretakö enaʼö laheta Danieli moroi ba daʼö. Maʼifu na no mesokho Danieli. Iʼanemaiʼö ibeʼe faretania razo, ’Miraʼu fefu niha samobahulu Danieli, ba mitiboʼö ira ba dögi zingo.’ Me latiboʼö, iʼanemaiʼö lafatuyu ira singo.

Ifaretakö nono mbanuania Dario: ’Fefu niha enaʼö lafosumange Lowalangi Danieli. No iʼefaʼö Danieli moroi ba mbawa zingo.’

Hadia mangandrö ndraʼugö khö Yehowa ero maʼökhö simane Danieli?