Míídiya dineʼé Daráíyas wolyéego Bábilangi naatʼáanii jílı̨́. Daráíyas éí Daniel yéigo nitsékeesígíí baa ákozhnízin, áko bídahólníihii yilą́ąjįʼ sizı̨́įgo ájiilaa. Ákondi éí dahoołchʼı̨́ı̨́d áádóó Daniel nahjįʼ kódeidoolíiłgo yindahaʼá. Bił béédahózin Daniel éí táadi Jiihóvah bichʼįʼ sonízdílzįįhgo anáʼátʼááh. Daráíyas ádeiłní: ‘Tʼáá ni tʼéí nichʼįʼ sohodizingo bee hazʼáanii ádoolnííł. Doo akʼeh hółʼínígíí éí náshdóí bitsiijįʼ ditłʼoii shijééʼ góyaah ahodiʼyoolghą́ą́ł.’ Daráíyas bił yáʼátʼéehgo, bee hazʼáanii áyiilaa.

Bee hazʼáanii ályaii baa hozdiiztsʼą́ąʼgo, Daniel haghangi níjídzá. Tsésǫʼ bidáahgi nitsizhdinígoʼgo Jiihóvah bichʼįʼ sozdoolzin. Dahoołchʼı̨́ı̨́d yę́ę hoł yah ííjéeʼgo sozdilzingo hadahodeesʼı̨́ı̨́ʼ. Daráíyas yichʼįʼ nídiijéeʼgo ádeiłní: ‘Daniel doo nikʼeh hółʼı̨́į da. Tʼááłaʼ jı̨́ biDiyin táaʼdi yichʼįʼ sonídílzįįh.’ Daráíyas éí Daniel hoł yáʼátʼéhígíí biniinaa doo dadootsaał da jinízin. Díí baa nitsíjíkeesgo iʼííʼą́. Azhą́ naatʼáanii jílı̨́į ndi, bee hazʼáanii ájiilaa yę́ę doo tʼą́ą́ʼ ánízhdoodlíił da. Áko náshdóí báádahadzidgo shijééʼ góneʼ Daniel ahołhan jidííniid.

 Tłʼééʼ bíighah Daráíyas éí Daniel baa hóniʼgo tʼáadoo ajiiłhaazh da. Abínígo Daniel bichʼįʼ jílwodgo bíká ázhdííniid. Ájíní: ‘Daʼ niDiyinísh yisdánííłtı̨́?’

Daniel hajoodzíiʼgo Daráíyas hodiiztsʼą́ą́ʼ. Daniel éí Daráíyas ííłní: ‘Jiihóvah bidiyingo naalʼaʼí náshdóí dáádadéestsxahgo áyiilaa, áko tʼáadoo atídashiilaa da.’ Daráíyas tʼáá íiyisíí bił hóózhǫǫd! Daniel háádooltééł jiní. Daniel éí doo haa dayitʼéhí da. Naatʼáanii Daráíyas éí ‘hastóí Daniel yikʼídahaʼááh yę́ę tʼáá éí aʼáán góyaa adahołtłʼiid,’ ní. Ákóneʼ adahoʼdiistłʼíidgo, náshdóí hooldéél.

Daráíyas kótʼéego saad bidziil yee haadzííʼ: ‘Daniel biDiyin náshdóí yitsʼąą yisdábííłtı̨́. Tʼáá ánółtso Daniel biDiyin dadíínóhsin doo.’

Daniel nahalingo, tʼáásh ákwii jı̨́ Jiihóvah bichʼįʼ sodílzin?