Omugabe ondiijo owa Babulooni akaba ari Dario Omumeedi. Dario akareeba ngu Danieli akaba ari ow’omutaano. Akahindura Danieli omureeberezi w’abashaija bakuru omu nsi egyo. Abashaija abo bakagirira Danieli eihari kandi bakaba nibenda kumwihaho. Bakaba nibamanya ngu Danieli naashaba Yehova emirundi eshatu buri izooba, n’ahabw’ekyo bakagambira Dario bati: ‘Nyakusinga omugabe, hashemereire kubaho ekiragiro ekirikugira ngu buri omwe ashabe iwe wenka. Weena oraagomere ekiragiro ekyo ashemereire kunagwa omu kiina ky’entare.’ Dario akakunda ekiragiro ekyo, yaakitaho omukono.

Ahonaaho Danieli ku yaahuriire ekiragiro kisya, akaza omu nju ye. Akatsimba amaju omu maisho g’edirisa eyigwire yaashaba Yehova. Abashaija b’eihari bakataaha omu nju ye baamukwata naashaba. Bakamutwarira Dario baamugira bati: ‘Danieli ariyo naakugomera. Naashaba Ruhanga we emirundi eshatu buri izooba.’ Dario akaba naakunda Danieli kandi akaba atarikwenda ngu afe. Eizooba ryona akateeraho kuteekateeka oku araajune Danieli. Kwonka n’obu yaakuba omugabe akaba atarikubaasa kuhindura ekiragiro eki yaabaire yaataireho omukono. Akaba aine kuragiira abashaija be kunaga Danieli omu kiina ky’entare.

 Ekiro ekyo, Dario akaba ayerarikiriire munonga ahari Danieli kyamureetera kubura oturo. Omu kasheeshe, akairuka yaaza aha kiina yaayeta Danieli ati: ‘Ruhanga waawe akujunire?’

Dario akahurira eiraka. Akaba ari Danieli! Danieli akagambira Dario ati: ‘Maraika wa Yehova aigaire eminwa y’entare. Tizimputeize na kakye.’ Dario akashemererwa munonga! Akaragiira ngu baihe Danieli omu kiina ky’entare. Danieli akaba ataine buhuta bwona. Bwanyima omugabe akaragiira ati: ‘Abashaija abateire orubanja ahari Danieli mubanagye omu kiina ky’entare.’ Ku baanagire abashaija abo omu kiina ky’entare, ahonaaho zikabarya zaabamaraho.

Dario akaha abantu be ekiragiro ekirikugira kiti: ‘Buri omwe ashemereire kutiina Ruhanga wa Danieli. Ajunire Danieli entare.’

Nooshaba Yehova buri izooba, nka Danieli?