Babiloniapeqa Persiamanta Darioñataj rey karqa. Payqa Daniel kʼacha kasqanta reparaspa, payta churarqa Babiloniapi kaj autoridadesmanta cargoyoj kananpaj. Chay autoridadestaj paymanta envidiakuspa wañuchiyta munarqanku. Yacharqankutaj Daniel sapa día kinsa kutita Diosmanta mañakusqanta. Chayrayku Darioman nerqanku: “Reyníy uj leyta churay qanllamanta tukuypis mañakusunankupaj. Chay leyta mana kasukojtaj leonesman wijchʼuykusqa kachun”, nispa. Dariotaj chay leyta churarqa.

Danieltaj chayta yachaytawan wasinman riporqa. Ventanasninta kicharispataj qonqoriykukuspa orakorqa. Chay envidiakoj runastaj Danielpa wasinman yaykuytawan, orakushajta tariparqanku. Chantá rey Darioman willamorqanku: “Danielqa mana kasusunkichu. Payqa sapa día kinsa kutita Diosninman orakun”, nispa. Reyqa Danielta munakusqanrayku mana wañuchinankuta munarqachu. Jinapis firmasqan leyta mana cambiayta aterqachu. Diantintataj piensarqa imaynallamantapis Danielta librananpi. Ni imata ruwayta atispataj Danielta leonesman wijchʼuykucherqa.

 Chay tuta, Darioqa Danielmanta llakikuspa mana puñuyta aterqachu. Sutʼiyamojtintaj leonespa tʼoqonman usqhayta correspa nerqa: “¡Daniel! ¿Diosniyki salvasunkichu?”, nispa.

Danieltaj nerqa: “Jehová Diospa angelnin leonespa siminkuta wisqʼaykorqa, mana imananawankupaj”, nispa. Dariotaj chayta uyarispa mayta kusikorqa, Danieltataj leonespa tʼoqonmanta orqhocherqa. Danieltaj mana imanasqa kasharqa. Chantá reyqa nerqa: “Danielmanta envidiakojkunata leonesman wijchʼuykamuychej”, nispa. Wijchʼuykojtinkutaj leonesqa chay rato mikhuykakaporqanku.

Darioqa nerqa: “Tukuypis Danielpa Diosninta jatunpaj qhawanaykichej tiyan. Paymin Danielta librarqa”, nispa.

Daniel jina sapa día orakuna.