Media nacionniyuq Darioñam Babiloniapi kamachirqa. Paymi Danielta chay nacionpi ancha riqsisqa runakunapa jefen kananpaq churarqa. Chayraykum chay runakunaqa Danielta wañuchiyta munarqaku, hinaspapas kimsa kutikama Jehova Diosta mañakusqanmanta yachaspankum Dariota nirqaku: “Kamachiqllayku, lliw runakunatayá kamachiy qamllata mañakusunaykipaq. Mana kasusuqnikiqa leonkunapa kasqanmanyá wischuchikuchun”, nispa. Darioqa chayna kananpaqmi tantearurqa.

Danielqa kamachiqpa chayna tantearusqanta yacharuspanmi, wasinpa ventanan lawpi Jehova Diosta qunqurakuykuspa mañakurqa. Chay chiqnikuq runakunañataqmi mañakuchkaqta Danielta tarirurqaku, hinaspankum Darioman kamaslla kaynata willarqaku: “Danielqa kimsa kutikama Diosninta mañakuspanmi qamtaqa mana kasusunkichu”, nispa. Darioqa Danielta kuyasqanraykum imayna tanteasqanta chinkachinanpaq tukuy punchaw piensarqa, ichaqa manañam atikurqachu. Chaymi Danielta leonkunapa kasqanman wischuykachirqa.

 Chay tutam Darioqa puñuytapas mana atispan llumpayta llakikurqa. Achikyaramuptinñataqmi leonkunapa kasqanman kallpaspa qaparirqa: “¡Daniel! ¿Libraykusunkichu Diosniki?”, nispa.

Danielñataqmi uyariruspan nirqa: “Diosniypa angelnin leonkunapa siminta taparuptinmi mana imanawanchu”, nispa. Darioqa anchata kusikuspanmi chaylla Danielta hurquchirqa. Danielqa sanollam lluqsiramurqa. Chaymantam Darioqa Danielta chiqniq runakunata leonkunapa kasqanman wischuykachirqa. Chaymi paykunataqa tisaparuspa leonkuna mikururqaku.

Dariom kaynata kamachirqa: “Llapaykichikmi Danielpa Diosninta yupaychanaykichik. Paymi Danielta libraykun”, nispa.

Qampas, ¿Daniel hinachu sapa punchaw Diosta mañakunki?