Babilonia llactapica rey Dariomi mandajurca. Paica shujcunamanda Daniel diferente cashcatami cuenta japirca. Chaimandami chai llactapi importante gentecunata ricuriachun mandarca. Chai gentecunaca Danielta ninanda envidiashpami huañuchingapaj munanajurca. Paicunaca, Jehová Diosta punllapi quimsa viajeta Daniel mañajta yachashpami, reyman cashna nirca, jatun mandaj Dariolla, tucui gentecuna shuj dioscunata mañanapa randi candalla mañachunmi shuj ley tiana can. Chai leyta na cazujcunataca leongunapa utujupimi shitana can nishpa. Chaita rey Darío uyashpaca alicachishpami firmarca.

Chai mushuj ley llujchishcata yachaj chayashpami Danielca paipa huasiman yaicushpa ventana ladopi Jehovata cungurishpa mañarca. Na yashcapimi chai envidioso runacunaca Danielpa huasiman yaicushpa Daniel mañajujta ricurca. Chaimi paicunaca reyman cashna villagrirca: Danielmi, ‘can mandashpa churashcataca na cazun’. Ashtahuangarin punllapi quimsa viajetami paipa Taita Diosta mañajun nishpa. Rey Darioca Danielta ninandami alicachin carca. Danielta huañuchichunga na munarcachu. Chaimandami imashina salvanata punlla entero pensarijurca. Shinapash pai firmashca leytaca ni paipash na cambiaita usharcachu. Chaimi rey Darioca Danielta leongunapa utujupi shitachun mandana tucurca.

Chai tutaca rey Darioca, Danielmanda preocuparishpami puñuitapash na ushajurca. ‘Cayandi tutamandaca, leonguna tiaj utuju ladoman calpashpami’ cashna  caparirca, Daniel canba Taita Diosca, “¿leongunapaj shimimanda cacharichi usharcachu?” nishpa.

Rey Darioca, Daniel cashna nijtami uyarca: “Ñuca Taita Diosca, paipaj angeltami cachamurca. Paimi, leonguna ñucata ama imatapash rurachunga, shimita vicharca” nishpa. Chaita uyashpaca rey Darioca ninanda cushijushpami Danielta chai utujumanda llujchichun mandarca. Daniel chai utujumanda llujshishpaca ni shuj chugritallapash na charircachu. Chai jipami rey Darioca: ‘Danielta juchachij mandajcunata leonguna tiaj utujupi’ shitachun mandarca. ‘Paicuna nara alpaman urmajpillatami leongunaca tucuillata micurca’.

Chaimi rey Darioca cashna mandarca: Ñuca mandajuj tucui llactacunapi causajcunaca, Danielpa Taita Diosta respetashpami causana canguichi. “Paimi Danieltaca, leonguna micunamandapash” salvarca nishpa.

¿Canbashchu Daniel cuenda Jehová Diosta cada punlla mañangui?