Ко Вавилон уло јавер цари, адава сине о Дариј, о Медијцо. Ов приметинѓа кај о Даниел тано појавер таро јавера. Адалеске чхивѓа ле те надглединел е важна манушен ко царство. Ола сине леске бут љубоморна хем мангле те мударен ле. Џанена сине кај о Даниел молинела пе е Јеховаске секова диве по трин пути, адалеске пхенѓе е Даријеске: „Царе, ваљани те овел закони коте со ка пишинел кај ваљани те молинен пе само туке. Секој со нане те керел акава, ваљани те овел фрдимо ки дупка лавенцар.“ Е Даријеске свиџинѓа пе акава хем потпишинѓа о закони.

Кеда шунѓа о Даниел башо акава, гело песке кхере. Англи јекх пхравди пенџерка, пело ко кочака хем молинѓа пе е Јеховаске. О мануша со сине љубоморна кхувѓе ко лескоро кхер хем астарѓе ле сар молинела пе. Сигате геле ко Дариј хем вакерѓе леске: „О Даниел нане туке послушно. Молинела пе пле Девлеске трин пути ко диве“. О Дариј мангела сине е Даниеле хем на мангела сине ов те мерел. Цело диве размислинела сине сар те спасинел ле. Ама, кеда о цари потпишинела сине несаво закони, никој нашти сине те менинел ле, чак ни о цари. Адалеске, нарединѓа пле манушенге те фрден е Даниеле ки дупка коте со сине бокхале лавија.

 Адаја рат, о Дариј сине бут секиримо башо Даниел хем нашти сине те совел. Сабајле гело ко Даниел хем викинѓа: „Даниел, дали то Девел спасинѓа тут?“

О Дариј шунѓа гласо. Адава сине о Даниел! Ов вакерѓа е Даријеске: „Е Јеховаскоро ангели пханља о муја е лавенгере. Ола ништо на керѓе манге. О Дариј сине бут радосно! Адалеске нарединѓа пле слугенге те икален е Даниеле тари дупка. О Даниел на сине ни пипимо таро лавија. Тегани о цари нарединѓа: „Фрден е манушен со мангле те мударен е Даниеле ки адаја дупка“. Кеда фрдинѓе лен, о лавија одма хале лен.

О Дариј бичхалѓа акаја наредба пле народоске: „Секова мануш ваљани те дарал таро е Даниелескоро Девел. Ов спасинѓа е Даниеле таро лавија“.

Дали ту да молинеа тут е Јеховаске секова диве сар о Даниел?