Ko Vavilon vladini aver kralj. Odova tano o Darije Međanin. Ov dikhlja so o Danilo tano averčhane ando avera. Odoljese čhivdža lje te nadgledini e bare manušen ko kraljevstvo. On hine but ljubomorna upro ljeste hem manglje te mudaren lje. On džandže so o Danilo molindža pe e Jehovase trin puti ko dive, odoljese phendže e Darijese: „Kraljo, valjani te ovel zakoni kuri ka pisini so sare valjani te molinen pe samo tuče. Svako ko na čerela odova, valjani te ovel fordimo ki lavovsko jama.“ E Darijese sviđindža pe akava hem odoljese potpisindža o zakon.

Ked o Danilo šundža akava, dželo pese čhere. Anglo jekh phravdo prozori, pelo ko kočija hem molindža pe e Jehovase. O manuša kola hine ljubomorna, khuvdže ko oljeso čher hem arakhlje lje sar molini pe. Sigate dželje ko Darije hem phendže ljese: „O Danilo nane tuče poslušno. Molini pe peklje Devljese trin puti ko dive.“ O Darije manglja e Danilo hem odoljese na manglja ov te merel. Celo dive razmislindža sar te spasini lje. Ama, ked o kralj potpisini disavo zakon, niko našti te menjini lje, čak ni o kralj. Odoljese, naredindža peklje manušendže te forden e Danilo ki jama kuri hine o bokhalje lavija.

 Odija rat, o Darije but brinindža pe e Danilose hem naštindža te sovel. Sabalje, dželo ko Danilo hem vičindža: „Danilo, da li to Devel spasindža tut?“

Tegani, o Darije šundža glaso. Odova hine o Danilo! Ov phendža e Darijese: „E Jehovaso anđeo phanlja e lavenge muja. On ništa na čerdže maje.“ O Darije hine but radosno! Odoljese, naredindža pe slugendže te ikaljen e Danilo andi jama. O lavija ni na pipindže e Danilo. Tegani o kralj naredindža: „Forden ki odija jama e manušen kola manglje te mudaren e Danilo.“ Ked fordindže ljen, o lavija odmah halje ljen.

O Darije bičhaldža akija naredba pe narodose: „Svako manuš valjani te daral kotar e Daniloso Devel. Ov spasindža e Danilo ando lavija.“

Da li hem tu molineja tut e Jehovase svako dive sar o Danilo?