Сар прожыля время, андо Вавилоно царёса ашэля о Дариё, саво мидянино. О Дариё додиқля, кай о Даниило на сас, сар авэр. Во стодя лэ Даниилос, кай во тэ авэл май барэдэр кодэлэндар, ко сас барэ мануша андо царство. Кадэла мануша линэ тэ холявэн по Даниило. Васо? Лэндэ на сас кода, со сас лэстэ и вонэ закамлэ, кай лэс тэ на авэл. Кадэла мануша ӷанэнас, кай о Даниило мангэласпэ лэ Иеговасти трин разоря андо дес. Важ када вонэ ԥэндэ лэ Дариёсти: «Царё, трэбуй тэ стос законо, андэ саво авэла пистромэ, кай тэ мангэнпэ кати тути и будэр никасти. Если варико на терэла кадя, сар пистромэ андэ кадэва законо, тоди лэс трэбуй тэ шон кай и леворя андэ яма». Лэ Дариёсти чалеля, со вонэ ԥэндэ, и во подпистросардя кадэва законо.

Кала о Даниило ашундя пала кадэва нэво законо, во жыля андэ пэско цэр. Во терделя пэ чанга паша фэлястра и ля тэ мангэлпэ лэ Иеговасти. Андэ кадэя время и мануша, савэ сас холинатирэ пэр лэстэ, динэ андэ лэско цэр и додиқлэ, кай во мангэлпэ лэ Дэвлэсти. После када вонэ нашлэ каринг о Дариё и ԥэндэ: «О Даниило на терэл кадя, сар пистромэ андо законо. Во кадяжэ тривар андо дес мангэлпэ лэ Дэвлэсти». О Дариё любияс лэ Даниилос и на камэлас, кай во тэ мэрэл. Вся о дес во гиндояс важ кода, сар тэ фэрий лэ Даниилос, кай лэса нисо тэ на авэл. Но кадя, сар о царё подпистросардя кадэва  законо, во нащи сас лэс тэ парувэл. Важ када лэ царёсти прижыляпэ тэ приԥэнэн, кай лэ Даниилос тэ шон кай и леворя андэ яма.

Вся и рят о Дариё нащи засовэлас, важ кода кай лэстэ дуқалас оди пала Даниило. Тэсара во поднашля каринг и яма и ԥэндя: «Даниило, фэрисардя тут тиро Дэл?»

И о Даниило анда яма ԥэндя: «Лэ Иеговаско анӷело заԥандадя лэ левонэнди о муй. И леворя нисо манди на тердэ». О Даниило даже на сас обрангло. О Дариё сас фартэ радо. Во ԥэндя, кай лэ Даниилос тэ вилэн анда яма. После када о царё приԥэндя: «Анэн лэ манушэн, савэ дошалярэнас лэ Даниилос и шон лэн андэ кодэя яма». Сар кати кадэлэ манушэн шутэ андэ кодэя яма и боқалэ леворя хуклэ пэр лэндэ и похалэ лэн.

После када о Дариё росбишалдя всаворэ пэстирэ народости кацаво законо: «Тумэ всаворэ трэбуй тэ даран лэ Дэвлэстар, савэс кандэл о Даниило. Лэско Дэл фэрисардя лэс лэ левонэндар».

Вижал тутэ тэ мангэспэ кажно дес лэ Иеговасти кадя, сар када терэлас о Даниило?