Mbeni gbia ti Babylone ayeke lani Darius, so ayeke zo ti kodro ti Mède. Darius abâ so Daniel ayeke ti lo nde mingi. Lo zia Daniel na ndö ti akota zo ti yâ ti kodro ni kue. Akoli ni asara kota bê na terê ti Daniel na ala ye ti hunzi na lo. Ala hinga so Daniel ayeke sambela ka Jéhovah fani ota lâ oko oko, ni la ala tene na Darius, atene: ‘Gbia, a lingbi a sigi na mbeni ndia so ahunda na zo kue ti sambela gï mo oko awe. Zo so ake ti sara ye alingbi na ndia ni so, a lingbi a bi lo na yâ ti dû ti abamara.’ Tënë ni so anzere na Darius, na lo sû maboko na gbe ti ndia ni so.

Gï na ngoi so Daniel amä tënë ti fini ndia ni so, lo gue na yanga-da. Na devant ti fenêtre ti lo so azi, lo sara agenou na lo sambela Jéhovah. Akoli so si kota bê asara ala so aga alï na yâ ti da ni na ngangu na ala wara Daniel so angbâ ti sambela. Ala mû loro ague asara tënë ni na Darius, ala tene: ‘Daniel ake yanga ti mo. Lo sambela Nzapa ti lo fani ota lango oko oko.’ Darius aye tënë ti Daniel na lo ye ti tene lo kui ape. Na yâ ti lango ni kue lo tara ti bâ tongana nyen la lo lingbi ti sö Daniel. Me même gbia wani kue apeut pëpe ti changé mbeni ndia so lo sû maboko na gbe ni awe. A lingbi lo mû yanga na azo ti lo ti gbu Daniel ti gue ti bi lo na dû ti abamara.

 Na bï ni, bê ti Darius agi lo mingi na ndö ti Daniel, a sara si lango akpe na lê ti lo. Na ndapre ni, lo mû loro lo gue na dû ti abamara ni na lo iri Daniel, lo tene: ‘Eskê Nzapa ti mo asö mo?’

Darius amä go ti mbeni zo. Go ti Daniel la! Daniel atene na Darius, atene: ‘Ange ti Jéhovah akanga yanga ti abamara ni. Ala sara sioni na mbi kete ape.’ Terê ti Darius anzere! Lo mû yanga ti tene a sigi na Daniel na yâ ti dû ni. Abamara ni akoto nga Daniel ape. Na pekoni gbia ni amû yanga, atene: ‘Ala bi akoli so abi tënë senge senge na li ti Daniel so na yâ ti dû ni.’ Na ngoi so a bi akoli ni so na yâ ti dû ni, abamara ni ate ala.

Darius amû yanga na azo ti lo, lo tene: ‘A lingbi zo kue asara mbeto ti Nzapa ti Daniel. Lo zi Daniel na yanga ti abamara.’

Eskê mo yeke sambela Jéhovah lâ na lâ tongana ti Daniel?