Lenye inkhosi yaseBhabhulona bekunguDariyusi umMede. Dariyusi wabona kutsi Danyela abehlukile. Wabeka Danyela kutsi abe ngumphatsi wemadvodza lebekasetikhundleni letisetulu. Lamadvodza aba nemona ngaDanyela futsi abefuna kumbulala. Ngesizatfu sekutsi bekati kutsi Danyela abethantaza kuJehova katsatfu ngelilanga, atsi kuDariyusi: ‘Nkhosi, sicela kube nemtsetfo lotsi nobe ngubani lothantaza kulomunye nkulunkulu nome umuntfu ngaphandle kwakho, utawujikijelwa emgodzini wemabhubesi.’ Dariyusi wakutsandza loko bebakusho wase uwubhala phansi lomtsetfo.

Ngekushesha nje Danyela nakeva ngalomtsetfo lomusha, wahamba waya endlini yakhe. Waguca embikwelifasitelo lelivuliwe wathantaza kuJehova. Lamadvodza lanemona angena endlini yakhe amtfola athantaza. Agijima aya kuDariyusi afike atsi: ‘Danyela akakuhloniphi. Uthantaza kuNkulunkulu wakhe katsatfu ngelilanga.’ Dariyusi abemtsandza Danyela futsi abengafuni abulawe. Wacabanga lilanga lonkhe kutsi angamsindzisa njani Danyela. Kodvwa abengeke asawushintja umtsetfo lasavele awubhale phansi. Watjela lamadvodza kutsi ajikijele Danyela emgodzini wemabhubesi lesabekako.

 Ngalobo busuku, Dariyusi abecabanga ngaDanyela futsi akazange akhone nekulala. Ngakusasa ekuseni, waya emgodzini wemabhubesi wamemeta Danyela ambuta kutsi Nkulunkulu wakhe umsindzisile yini.

Dariyusi weva livi. Bekulivi laDanyela. Waphendvula Dariyusi watsi: ‘Ingilosi yaJehova ivale imilomo yemabhubesi. Akakangidli.’ Dariyusi wajabula kakhulu. Watsi akakhishwe emgodzini. Danyela abengakalimali ngisho nakancane. Inkhosi yabese itsi: ‘Jikijelani lamadvodza lacebe Danyela emgodzini.’ Lamadvodza lebekajikijelwe emgodzini adliwa ngemabhubesi.

Dariyusi wakhipha umyalo, watsi: ‘Wonkhe muntfu kufanele esabe Nkulunkulu waDanyela. Usindzise Danyela emlonyeni wemabhubesi.’

Uthantaza kuJehova onkhe malanga yini njengaDanyela?