Datu tuhụe nẹ̌parenta Babelẹ̌ ute i Darius tau Media. Su těngong Darius, i Daniel nẹ̌tatěntang bọu pejabat wal᷊inẹ. Hakị u ene, i Darius něhengkẹ si Daniel nakoạ měngangawasa kěbị taumata penting su Babelẹ̌. I sire iri si Daniel kụ mapulu měmate si sie. I sire masingkạ i Daniel mědẹ̌doa si Yehuwa tělung sul᷊ẹ sahěllo. Hakị u ene i sire nẹ̌bera si Darius , ’Tuangku Datu, mapaelẹ̌ mạeng piạ atorang kěbị taumata harusẹ̌ mẹ̌doa kětạeng si Tuang. I saing tawe tumuhụ atorang ene harusẹ̌ děmẹkang sarang lohangu Singa.’ Darius setuju kụ nẹ̌tanda tangan atorang ene.

Su apang i Daniel nakasingkạ piạ atorang ene, i sie napulẹ sarang bal᷊ene. Bọu ene, i sie nẹ̌doa si Yehuwa su těngong janela kạbawuka. Sěngkělěndịu, taumata apang iri si sie simuẹ̌ kụ nakasilo si sie mědẹ̌doa. I sire apidu nakoạ sarang i Darius kụ naul᷊ị, ’Daniel tawe timuhụ si Tuang, i sie nẹ̌doa su Mawune tělung sul᷊ẹ sahěllo.’ Darius madiri i Daniel mate, ual᷊ingu i sie mal᷊uasẹ̌ si Daniel. Su kanandụu ěllo ene i sie mědẹ̌dea cara gunang mẹ̌tul᷊ung si Daniel. Katewe, sarang datu lai tawe makawal᷊ui atorang mạeng ene seng bọu nitanda tangan. Samurine Darius terpaksa něngoro tadeạu i Daniel pakirěmẹ su lohangu Singa.

 Su hěbi ene, Darius tawe nikahuntikilang ual᷊ingu gụgěnggang si Daniel! Dịěllo mal᷊ukadẹ̌, i sie natamai sarang lohangu singa kụ nẹ̌kui si Daniel dingangu tingihẹ̌ maihạ, ’Daniel, apa Mawunu něnal᷊amatẹ̌ si kau?’

Bọu ene, i Darius nakaringihẹ̌ tingihẹ̌. Ene tingihi Daniel! Daniel simimbahẹ̌, ’Malaekati Yehuwa něnutu mohongu manga singa ini. I sire tawe něngiki si siạ.’ I Darius sěbạe mal᷊uasẹ̌! I sie něngoro tadeạu i Daniel pakisěbang bọu lohang ene. Daniel tawe nal᷊esẹ sarang kadodọ. Bọu ene Datu něngoro, ’Samẹ i sire apang něnoke si Daniel, kụ děmẹ sarang lohangu singa.’ Su tempong nirěmẹ, i sire apidu nikinạ u singa.

Darius nẹ̌parenta su manga rakyate: ’Kěbị taumata harusẹ̌ měngadatẹ̌ Mawung i Daniel. I Sie něnal᷊amatẹ̌ si Daniel bọu singa.’

Kere i Daniel, apa i kau mědẹ̌doa si Yehuwa ěllo-ěllo?