I Dariosy Mediana ty mpanjaka i Babylona tafara tatoy. Trea i Dariosy fa miambake ty Daniela, le ie ty natao’e mpifehe o ndaty ambone’e reo. Nialogna i ndaty ambone rey ty Daniela, le teà iareo hovonoegne. Fanta iareo fa nivavake intelo isan’andro tamy i Jehovah ty Daniela. Le hoe iareo tamy i Dariosy: ‘O mpanjaka, manoa lalàna rehe tie toko’e hivavake ama’o raike avao o ndatio. Le ze ndaty tsy magneke i lalàna zay, hatorake an-dava o liona ao.’ Nagneke ty Dariosy, sady natao’e sonia i lalànay.

Noly an-tragno’e agne ty Daniela naho fa naharey i lalàna vaovaoy. Nisokafe’e i lafinete’ey, le nitongaleke naho nivavake tamy i Jehovah reke. Nilitse tama’e tao amy izay i mpialogne aze rey, le nahatrea aze nivavake. Nasisỳ iareo tamy i Dariosy ty Daniela tie mbe mivavake amy i Andrianagnahare’ey intelo isan’andro. Nipay fomba hagnavotagne i Daniela ty Dariosy satria tea’e reke. Ie ty mpanjaka, faie tsy nahazo nagnova ty lalàna fa natao’e sonia. Tsy maintsy natorake tan-dava i liona rey tao ty Daniela.

Tsy niazon-droro ty Dariosy tamy i halegney. Ie nimaray igne, le nimbamy i lavake misy lionay  mbeo reke sady nitoka mafe tie: ‘O Daniela, nagnavotse azo vao i Andrianagnahare’oy?’

Hoe ty Daniela: ‘Hinily ty anjely i Jehovah ty vava i liona rey, le tsy nihinagne ahy.’ Fale ty Dariosy, le nampagnakare’e boake ao ty Daniela. Tsy naratse ndra raike ty Daniela. Hoe ka i mpanjakay: ‘Atoraho an-davake ao ka i ndaty malaigne i Daniela rey.’ Rinimidrimy i liona rey i ndaty rey naho vata’e natorake tao.

Nampiboake lily ty Dariosy tafara izay tie: ‘Tsy maintsy matahotse ty Andrianagnahare i Daniela ty ndaty iaby, satria nagnavotse aze tsy hovonoe o lionao reke.’

Mivavake amy i Jehovah isan’andro mitovy amy i Daniela ka vao rehe?