Dariyo di’ose Mediya akayonga nkumekanga kekina ka Babilɔna. Dariyo akɛnyi dia Danyɛlɛ aki onto la laande. Nde aketɛ Danyɛlɛ owandji w’ɛnɛnɛ wa lo wodja. Apami asɔ wakokaka Danyɛlɛ kandjema ndo wakalange mbodiaka. Vɔ wakeyaka dia Danyɛlɛ akalɔmbaka Jehowa mbala shato lushi tshɛ. Ɔnkɔnɛ, vɔ wakatɛ Dariyo vate: ‘Nkumekanga le, dja ɔlɛmbɛ ɔmɔtshi wata dia onto tshɛ pombaka kɔlɔmbaka paka wɛmɛ. Onto tshɛ layɔnyɔla ɔlɛmbɛ ɔsɔ pombaka mbikadjema lo difuku dia ntambwɛ.’ Dariyo aketawɔ kanyi shɔ ndo akasinya ɔlɛmbɛ akɔ.

Kam’akoke Danyɛlɛ dikambo dia ɔlɛmbɛ w’oyoyo ɔsɔ, nde akatshu lo luudu lande. Nde akake adwe mbɛlɛnganɛ la didishi diaki hwe, ko akalɔmbɛ Jehowa. Apami wakawokaka kandjema wakɔtɔ la shashimoya lo luudu lande ndo wakotane alɔmba. Vɔ wakalawɔ otsha le Dariyo ndo wakawotɛ vate: ‘Danyɛlɛ ambokohindolɛ. Nde ekɔ lo nɔmba Nzambi kande mbala shato lushi tshɛ.’ Dariyo akalangaka Danyɛlɛ ndo nde konangaka dia nde mvɔ. Lushi l’otondo, nde akakanyiyaka woho wakandakoke nshimbɛ Danyɛlɛ. Koko kaanga nkumekanga kokoka ntshikitanya ɔlɛmbɛ wakandashile nsinya. Nde akahombe mbidjangɛ apami ande dia mbikadja Danyɛlɛ lo difuku dia ntambwɛ.

 L’otsho ɔsɔ, Dariyo akayakiyanya efula lo dikambo dia Danyɛlɛ ndo nde kokoka ndala djɔ. La pindju, nde akalawɔ otsha lo difuku diakɔ ndo akambola Danyɛlɛ ate: ‘Onde Nzambi kayɛ akakoshimbee?’

Dariyo akoke dui di’onto. Ɔsɔ aki dui dia Danyɛlɛ! Nde akatɛ Dariyo ate: ‘Ondjelo wa Jehowa akadihi enyɔ wa ntambwɛ. Yɔ hayonsale kɔlɔ.’ Dariyo aki l’ɔngɛnɔngɛnɔ w’efula! Nde akadjanga dia vɔ ntondja Danyɛlɛ oma lo difuku. Yɔ kokuna Danyɛlɛ kaanga lokala. Oma laasɔ nkumekanga akadjanga ɔnɛ: ‘Nyokadja apami wakafunde Danyɛlɛ lo difuku.’ Etena kakawakadja apami akɔ lo difuku, ntambwɛ yakawale.

Dariyo akadjangɛ anto ande ɔnɛ: ‘Onto tshɛ pombaka mboka Nzambi ka Danyɛlɛ wɔma. Nde mbakatsha Danyɛlɛ oma le waa ntambwɛ.’

Onde wɛ nɔmbaka Jehowa lushi tshɛ, paka oko wakasalaka Danyɛlɛ?