Ja Darío ja medo waj jun pilan mandaranum bʼa Babilonia. Ja yeʼn snaʼa ja Daniel jel chapan, ja yuj yaʼa bʼa skʼabʼ ja winike mas tʼilanik ja bʼa chonabʼ. Ja winike it jel skorajaʼane ja Daniel sok wa skʼanawe xchʼayjel snajel. Wa snaʼawe ja Daniel oxe ekʼele wa xyayi orasyon ja Jyoba ja bʼa kʼakʼu, ja yuj yalawe yabʼ ja Darío: «Ah, mandaranum, sbʼejni oj ajyuk jun ley bʼa spetsanil ja ixuk winik kechanta weʼn oj ajukawi orasyon. Ta ay maʼ skʼoko ja ley jaw, ajipxuk koʼ bʼa skʼejnal chojik». Ja Darío lekni yabʼi sok skʼulan pirmar ja leyi.

Yajni ja Daniel yabʼ ja leyi, waj bʼa snaj. Jaxa tiw, och mekʼan sok yayi orasyon ja Jyoba bʼa stiʼ jun bentana jaman ay. Ja winike junta chʼaykʼujol ochye kʼot ja bʼa snaji sok staʼawe wan yajelyi orasyon. Anto ajnelxta waj yalwe yabʼ ja Darío: «Ja Daniel skʼokota jawa leyi. Oxe ekʼele ja bʼa kʼakʼu wa xyayi orasyon ja sDyosi». Ja Darío jelni lek xyila ja Daniel sok mi xkʼana smile. Snajtil ja kʼakʼu spensaraʼan jas oj skʼuluk bʼa oj skoltay, pe mini ja yeʼn xbʼobʼ stukbʼes jun ley bʼa kʼulubʼalxa pirmar. Ja yuj tʼilani yaʼa mandar bʼa oj sjip-e koʼ ja Daniel ja bʼa skʼejnal ja kʼakʼal chojiki.

 Ja akwal jaw, ja Darío mi xbʼobʼ wayuk yuja mi xyaʼakan spensarajel bʼa Daniel. Ja bʼa sajto sakbʼeli, ajnelxta waj ja bʼa kʼeʼeni, skʼela koʼe sok awani: «¡Daniel! ¿Skoltaya maʼ jawa Dyosi?».

Ja Darío yabʼ jun kʼumal. Jani skʼumal ja Daniel. Ja Daniel sjakʼa: «Ja yanjel ja Jyoba slutuyi ja stiʼ ja chojiki, sok mi jas skʼulaneki». Ja Darío jelni gustoʼaxi sok yaʼa mandar bʼa ayawe eluk. Ja Daniel mini bʼa loxubʼal ja yajni eli. Tsaʼan, ja mandaranum yaʼa mandar: «¡Jipawik koʼ bʼa yoj kʼeʼen ja matik lom sleʼaweyi smul ja Daniel!». Yajni jipjiye koʼi, tixta kʼuxjiye yuja chojiki.

Ja Darío yayi ja mandar it ja xchonabʼi: «Kisawik apetsanilex ja sDyos ja Daniel. Ja yeʼn skoltay ja Daniel sbʼaja chojiki».

Jaxa weʼn, ¿wan maʼ xa wayi orasyon ja Jyoba spetsanil ja kʼakʼu, jastal ja Daniel?