DYONDZO 64
Daniyele eKheleni Ra Tinghala
Hosi yin’wana ya Babilona a ku ri Dariyosi wa Mumeda. Dariyosi u swi vonile leswaku Daniyele a a hlawulekile. U n’wi veke leswaku a rhangela vavanuna hinkwavo lava xiximekaka etikweni. Vavanuna lava a va vondzoka Daniyele naswona a va lava ku n’wi dlaya. A va swi tiva leswaku Daniyele a a khongela eka Yehovha kanharhu hi siku kutani va byele Dariyosi va ku: ‘Hosi ku fanele ku va ni nawu lowu vulaka leswaku vanhu hinkwavo va fanele va khongela eka wena ntsena. Loyi a nga wu yingisiki nawu lowu, u fanele a hoxiwa ekheleni ra tinghala.’ Mhaka leyi yi tsakise Dariyosi, kutani a pasisa nawu lowu.
Loko Daniyele a heta ku twa hi ta nawu lowu lowuntshwa u ye endlwini yakwe. U fike a khinsama emahlweni ka fasitere leri pfuriweke a khongela eka Yehovha. Vavanuna lava a va n’wi vondzoka va fike endlwini yakwe va n’wi kuma a ha ri eku khongeleni. Va tsutsumele eka Dariyosi va fika va ku: ‘Daniyele a nga wu yingisi nawu lowu u wu vekeke. U khongela eka Xikwembu xakwe kanharhu hi siku.’ Dariyosi a a rhandza Daniyele naswona a a nga swi lavi leswaku a fa. U hete siku hinkwaro a ri karhi a lava ndlela yo ponisa Daniyele. Kambe hambi ku ri hosi a yi nga ta wu cinca nawu lowu yi wu pasiseke. U boheke ku lerisa vavanuna vakwe leswaku va hoxa Daniyele ekheleni ra tinghala leti karihaka.
Vusiku byebyo, Dariyosi a a karhatekile swinene hi Daniyele lerova a heleriwa hi vurhongo. Loko ri xa, u tsutsumele ekheleni ra tinghala kutani a fika a vitana Daniyele a ku: ‘Xana Xikwembu xa wena xi ku ponisile?’
Dariyosi u twe rito. A ku ri ra Daniyele. U byele Dariyosi a ku: ‘Ntsumi ya Yehovha yi pfale milomu ya tinghala. A ti ndzi dyanga.’ Dariyosi a a tsake ngopfu! U lerise leswaku Daniyele a humesiwa ekheleni ra tinghala. Daniyele u hume a nga vavisekanga nikatsongo. Kutani hosi yi lerise yi ku: ‘Va lahleleni ekheleni ra tinghala vavanuna lava a va lava leswaku Daniyele a fa.’ Loko vavanuna lava va lahleriwa ekheleni, tinghala ti lo namba ti va kakatlula.
Kutani Dariyosi u vule xileriso lexi eka vanhu vakwe: ‘Vanhu hinkwavo va fanele va chava Xikwembu xa Daniyele. Xi n’wi ponise ekheleni ra tinghala.’
Xana na wena u khongela eka Yehovha siku ni siku ku fana na Daniyele?
“Yehovha wa yi tiva ndlela yo va kutsula endzingweni lava tinyiketeleke eka yena.”—2 Petro 2:9
U Nga Ha Tsakela
TIDYONDZO TA MINA TA BIBELE
Daniyele A A Khongela!
Pfunani n’wana wa n’wina a vona nkoka wo khongela eka Xikwembu siku ni siku.
MAKHADI YA VANHU VA LE BIBELENI
Khadi Ra Bibele Ra Daniyele
Ha yini Daniyele a hoxiwe ekheleni ra tinghala? Kopa khadi leri ra Bibele naswona u dyondza leswi engetelekeke hi Daniyele.
XIHONDZO XO RINDZA
Xana Tintsumi Ti Nga Hi Pfuna?
Xana hi fanele hi khongela eka tintsumi leswaku ti hi pfuna?
